Nunaqarfiit qanoq akisussaaffeqassanersut suli nalorninarpoq

Assersuutigalugu Qeqqata Kommuniata nunaqarfitik sapinngisamik nammineertinniarpaat, immikkullu aningaasliiffiginiarlugit. Kommune Kujallermili suli aalajangertoqanngilaq.

Nunaqarfimmiut aqutsisussaminnik marlunngorpat qinersissapput. Aqutsisunngortussalli oqartussaaffiit suut tigussavaat?

Tamanna erseqqissumik akissutissaqartinneqanngitsoq, Radioavisip paasiniaanermini paasivaa.

Qeqqata Kommuniani borgmesterip Hermann Berthelsenip erseqqissarpaa nunaqarfitik sapinngisaq tamakkerlugu nammineertinniarlugit.

- Sisimiut Kommunerisimasaani taamatut suleriaaseqarpugut. Tamannalu Qeqqata Kommuniani ingerlatiinnarniarparput, Hermann Berthelsen oqarpoq.

Taamaammat Qeqqata Kommuniani aningaasaliissutaareersut saniasigut nunaqarfiit aningaasaliiffigineqassapput. Nunaqarfiit tamarmik aningaasartuutinut ilimaginngisanut atugassanik immikkut 200.000 koruuninik tuniniarpaat; tamakku kultoorimut, timersornermut, teknikkikkut ingerlatsinernut, suliffissanut, inunnilluunniit isumaginninnernut atugassaapput.

- Siunertaavoq nunaqarfiit uagut apereqqaanngikkaluarluta aningaasartuuteqarsinnaaneri, assersuutigalugu puttasortaarniarunik pisiarisinnaavaat uagut apereqqanngikkaluarluta, Hermann Berthelsen oqarpoq.

Pingasunngorpat kommunalbestyrelsemi ataatsimiinnermi Maniitsumi pisussami, 200.000 koruuninik tapiisarnissamik siunnersuut oqaluuserineqassaaq.

Qaasuitsup Kommunianissaaq sapinngisamik nunaqarfiit nammineertinniarneqartut, borgmester Jess Svane erseqqissaavoq.

Januaarip aallaqqaataaniilli Qaasuitsup Kommuniani nunaqarfiit aningaasaqarnertik nammineerlutik ingerlatarilerpaat. Taamalu suleriaaseq qinersinerup kingorna atorneqassasoq Jess Svane erseqqissaavoq.

Kommune Kujallermi maannamut suli aalajangiunneqanngilaq kommunit kattunnikut akisussaaffiit sorliit tigussaneraat, borgmester Simon Simonsen radioavisimut oqarpoq.

- Qinersineq naammasseriarpat nunaqarfinni aqutsisunngortut kommunimut ataatsimiigiaqqusavavut, ataatsimoorluta nunaqarfinni aqutsisunngortut suut akisussaaffigilissaneraat oqallisigissallutigik, Simon Simonsen nassuiaavoq.

Takorloornerarpaali sanaartornermi isumagisassat, kultoorimullu tunngasunik aaqqissuussinerit isumagilerumaaraat.

Kommune Kujalliup nunaqarfinnilu aqutsisunngortussat naapinnissaat suli ullulerneqanngilaq.

Kommuneqarfik Sermersuumissaaq nunaqarfinni aqutsisussanik marlunngorpat qinersereernerup kingorna aalajangiinissaq siunniusimaneqarpoq.