Nunaqarfiit Ilisimatusarfimmi oqallisigissavaat
Artek-imeersup, Kåre Hendriksenip, ilisimatuutut misissuinini, januaarip naanerani illersukkani, aallaavigalugu oqalugiaatigissavaa.
Nunaqarfiit aningaasaqarnikkut, inuussutissarsiornikkut aamma isumaginninnikkut qanoq ineriartorsimanersut, Kåre Hendriksenip oqalugiaatigissavai. Inoqarfiit mikisut oqaluttuarisaanerat, aamma ullutsinni oqallisigineqartut aallaavigalugit, oqalugiaataani sammineqassallutik.
Nunaqarfinni pisortat aningaasartuutaat ataatsimut isigalugit, illoqarfinni aningaasartuutaasartut assigiinnaraat, Kåre Hendriksenip ilisimatuutut misissuinermini ilaatigut paasisimavaa, aamma sullissinerup qaffasissusia tamatumunnga ilaatigut pissutaasoq paasisimallugu.
Taamaattorli nunaqarfiit amerlanerpaartaat isumaginninnikkut illoqarfinnut amerlanernut sanilliullugit akikinnerusut, Kåre Hendriksenip paasivaa, nunaqarfinni innuttaasut piniarnermik aamma aalisarnermik inuussutissarsiuteqarnerat pissutigalugu.
Inuiaqatigiilerinermut Immikkoortortap tusagassiuutinut nalunaarummini oqaatigaa, Nunatsinni nutarterinermi nunaqarfiit matoorarnissaat pisariaqassanersoq, imaluunniit ineriartornissaannut periarfissanik pilersaarusiortoqarnissaanut oqallinnermi, Kåre Hendriksenip ilisimatuutut misissuinera, annerusumik paasinninnissamut tapertaassasoq.
