Nunaqarfiit aningaasaqarnerat ineriartortinneqarnerallu sammineqassaaq
Nunatsinni nunaqarfiit aningaasaqarnerat ineriartortinneqarnerallu PhD Kåre Henriksenip Nuummi Katuami Ikinngutigiit inaanni marlunngorpat unnukkut oqalugialeruni sammissavai. Oqalugiarneq nal. 19.00 aallartissaaq nalunaaquttallu akunnerinik marlunnik sivissussuseqassangatinneqarluni.
Allattoq Peter Troelsen, Simon Uldum
maajip 13-at 2013 08:42
Kåre Henriksenip PhD-nngorniutaani "Kalaallit Nunaanni nunaqarfiit - aningaasaqarnerat ineriartortinneqarnerallu”, Kalaallit Nunaanni nunassittarnermut atatillugu pisortat aningaasartuutaat pingaartumillu nunaqarfiit tamatumunnga sunniutaat misissorneqarput.
Peqatigitillugu nunaqarfinni immikkut toqqakkani 24-ni najukkami ineriartortitsineq misissoqqissaarneqarpoq, nunaqarfiit ataasiakkaat inuiaqatigiit aningaasaqarnerannut sunniutaat, isumaginninnikkut sullissineq, kinaassutsimik misigisimaneq innuttaqqortussuseq il.il. sammineqarlutik.
Allaaserisami Kalaallit Nunaanni nunassittarneq pillugu allaanerusumik sammineqarpoq, kiisalu siunissami pilersaarusiornermi suut ilanngunneqartariaqarnerinut siunnersuutitaqarluni.
