Nunap inuiisa pisinnaatitaaffii sammivaat
Tumerpaarpaarpalaaq indianerillu erinaatitoqaat Nuummi ulluni makkunani tusarsaapput. Michael Paul Hill USA-meersoq eqqillit Apache-t ilagisaat, nunap inuiisa pisinnaatitaaffii pillugit Nuummi pikkorissaqataavoq, naallu Naalagaaffiit Peqatigiit inuttut pisinnaatitaaffiit pillugit aalajangersagai ilisimassallugit pisariaqaraluaqisut, isumaqarpoq pinngortitsisoq qanillugu inuuneq nunap inuiinut pingaarnerpaajusoq.
Eqqilik Apache-t ilaat Michael Paul Hill Nuutoqqami tujuuluaraannaalluni, ikinngutitaani saallugit ,tumerparpaarannguaq katuarusaarpaa. Nammineq oqaatsini atorlugit qinnussivoq, akornatigullu qajuusaasat aappaluttut sungaartullu pikkorissaqatiminut taartumik amiliunerusunut nakkalatserusaartarpai, tiguartisimaqalutik tusarnaaraanni. Ungataanilu ipput qipoqqaat, ilulissat qajartortullu soorluuna allamut saasaariinnallartut.
Qinnussinerali ima illernartigaaq immiuteqqusaanani, soormitaava?
Inuuvugut asanninneqanngitsumik. Asanninneqanngikkaangallu immitsinnut aserorsartarpugut, aamma nuna qilallu sequtserlugu. Taamaammat asannittariaqarpugut, aamma pinngortitamut. Inuimmi asanninneqanngitsut kamaqalertarput, kamannerlu taanna allanut tuniluuttartoq. Taamaattumik asanninneq toqqarsiuk, Michael Paul Hill, oqarpoq, nangillunilu:
- Nunap inoqqaajusugut naapeqatigiinniassagatta, Pinngortitsisup nunanut allanut angalatippaatigut. Anersaaq akornatsinniittoq naliitsuuvoq. Anersaaqarata inuugutta muteernimik inuusunut nallersuuteqqajaajuassaagut, tamannalu uagutsinnut ajoqutaaginnassasoq nalunngivipparput. Taamaammat anersaaq ikiortigalugu kinaanerput suminngaanneernerpullu eqqaamajuartigu, eqqilik naggasiivoq.
Nunap inuii, ITCIP-imik taasami pikkorissarneranni peqataasut ilaatigut nunat Bangladesh, India, Niger aamma Guatemala aggerfigaat, nunalerngusaannerit – qinngarsuinermik sapilernermillu ilallit – ulluinnaralugit.
ITCIP tassaavoq ”Nunat tamalaat inoqqaavisa ilinniarfiat”. Suliniaqatigiiffik taanna Ilinniarfissuup rektorerisimasaanit Ingmar Egede-iugaluamit 1997-mi aallartinneqarpoq.
