Nunap inoqqaavisa suliaat Vatikanimi katersaatigineqartut uterteqquaat
Sapaatip akunnerata matuma naanerani Pave Fransis Canadaliassaaq nunap inoqqaavinut, katuullit najugaqarfiutigalugit atuarfiini naalliutsinneqartarsimasunut utoqqatseriartorluni.
Pavep Canadaliarnissaa sioqqullugu Canadami nunap inoqqaavisa ilaat kissaateqarput katersaatit Canadami nunap inoqqavisa suliaat Vatikanimi katersugaasivinniittut nunap inoqqaavinut utertinneqartariaqartut.
Taama amerikamiut nutaarsiassaqartitsiviat ABC News allaaserinnippoq.
-Suliat tamakkua uagut pigaavut, angerlaanneqartariaqarpullu, Cassidy Caron naggueqatigiit Metisit siulittaasuat, Metisit sinnerlugit katuullit Paveanut Fransisimut utertitseqqusilluni taama oqarpoq.
Canadami nunap inoqqaavisa suliaannik utertitseqqusineq Pave Fransisip Canadamut sapaatiuppat utoqqatseriartornerani aamma oqaluuserineqassaaq.
Canadami nunap inoqqaavisa suliaat Vatikanimi katersugaasivissuarni tusaamasaasuni ilaatigut nunarsuarmi qalipaasartut tusaamaneqarpaat ilaata Michel Angelop qalipagaanik Egyptimiullu itsarsuaq suliaannik katersaatinut ilaallutik saqqummersinneqartarput.
Nunarsuarmi kulturinit assigiinngitsuneersunik Vatikanimi katersugaasivik Anima Mundi Canadap nunallu allat inoqqaavisa suliaannik tusindilinnik katersaateqarpoq. Suliarpassuit tamakku katuullit palasiisa qangaaniilli Vatikanimut nassiussortarsimavaat. Suliarpassuit ilaatigut tassaasut natsat timmissat meqquinik sanaat, aarrit tuugaavi, kiinappaat, ammillu allapalaakkat taamani Paveusumut Piussit aqqarnannut tunissutaasimasut, Vatikanimit oqaatigineqarpoq.
Taamani Pave Piussit aqqarnata katuullit nunarsuaq tamakkerlugu ajoqersuiartortitaqarnerat nalliussiniarlugu nunap inoqqaavisa suliarpassui Vatikanip naatsiiviani 1925-mi saqqummersissimavai.
Canadami nunap inoqqaavisa aallartitaat siorna upernaakkut Vatikanimut Pave Fransis ataatsimeeqatigiartorlugu suliarpassuit takutinneqarmata apeqqusiilersimapput, ilaasalu suliat utertinineqarnissaat tassa kissaatigilerpaat.