Nunap inoqqaavi Alaskameersut COP15-imi peqataapput
Indiaanerit tumerparpaarpalunnerat tusarsaavoq, allagartarsuillu qalipaatigissaaqisut Bella Centerip qiterpasissuaniittut takuneqarsinnaapput. "Nunap inoqqaavisa pisinnaatitaaffii ataqqineqartariaqarput", allagartarsuarmi allassimavoq.
Immat qaffakkaluttuinnarnerat, nunallu qeriuaannertup aakkiartuinnavinnera arnap Alaskameersup ernummatigaa:
- Immap sikua aakkiartorpoq, anorersuarujussuit akulikinnerulersillugit, pinngortitallu neriunneranik pilersitsilluni. Inooqatigiit inuunerat ajornerulerpoq, allamullu nuuttariaqalerlutik. Silap pissusaata allanngoriartornera pissutaalluni allamut noorarput, Faith Gammel, nunat inoqqaavisa suliniaqatigiiffiat IPO, aamma Alaska sinnerlugu COP15-imut peqataasoq, oqarpoq.
Naggueqatinilu nunaminni inuuniassagunik pinngortitap tunniussinnaasai pinngitsoorsinnaanngilaat, soorlu Kalaallit Nunaanni taamaattoqartoq.
Alaskap 5 procentiinnaa nunap inoqqaavinit najugaqarfigineqarsinnaavoq, sinneri 95 procentit uuliasiorfigineqarsinnaallunilu, gassimik qalluiffiusinnaallunilu aatsitassarsiorfigineqarsinnaasutut USA-p oqartussaasuinit periarfissinneqarnikuusoq Faith Gammelip oqaatigaa:
- Nunarput ataannassaguni tunisassiorsinnaasariaqarpoq, suliffeqarfiillu tamakku nunarput mingutsitsiffigiinnassavaat. Inuuniutissavut mingutitsiffigissavaat, peqqissutsitsinnullu sunniuteqapilussinnaallutik, Faith Gammel oqarpoq, nangillunilu:
- Nunap inoqqaavi USA-p ataqqisariaqarpai, nunarpullu asuli pinnagu. Pisinnaatitaaffigut ataqqineqartariaqarput, Faith Gammel naggasiilluni oqarpoq.
Nunat inoqqaavisa suliniaqatigiiffiat IPO nunallu inoqqaavisa pisinnaatitaaffii Københavnimi Nytorvimi Arktisk Teltimi ullumi sammineqarput.