Nunap assigi nutaat takkupput
Nunap assigani ataatsimi takuneqarsinnaalerpoq nunap isuaniit Arsummut, Ivittuuniit Kangerluarsorutsimut kiisalu Kangerluarsorutsimiit Isukasianut. Taakku saniatigut aamma saqqummerput Qeqqata Kommunia tamarmi kujammut Nuup Kangerluaniit avannamut Nassuttuumut. Nunap assingani kingullermi takuneqarsinnaavoq Qaasuitsup Kommunia Kangaatsiamiit Uummannamut.
Nunap assigi nutaajunngikkaluarput taamaattorli naqinneqarnerminni ilusaat nutaanngorsimalluni taamaasilluni nunarujussuaq nunap assigani ataatsimi naqinneqarsinnaanngorsimalluni, saqqummersitsisoq oqarpoq.
- Nunap assigini kommunini pisoqarfiunerusut takuneqarsinnaapput. Aamma taakku atorlugit kommunerisaq qimerloorneqarsinnaalerpoq. Taamaasilluni nunap assiga ataaseq atorlugu qimerloortoqarsinnaalerpoq siornatigut nunap assigi arlallit atorlugit taamaasiortoqartaraluartoq, Saga Mapsimi pisortaq Tage Schjøtt KNR-imut taama oqarpoq.
Tage Schjøttip oqarnera malillugu pisoqarfiuallaarneq ajortut nutaanik nunap assiliorneqanngillat. Tassaapput Tunu aamma Qaasuitsup Kommuniani Uummannamiit avannamut.
Saga Mapsip aamma saqqummersippai illoqarfiit assigi pisoqqat. Tassani pineqarput Ilulissat, Aasiaat, Sisimiut aamma Qaqortoq inissiarsuit sananeqanngikkallarmata sorsunnersuaq kingulleq sioqqullugu qanoq isikkoqarsimanersut tamatumalu kingorna tassa ineriartorneq sukkaqisumik aallartissimavoq.
