NunaOilip tiguneqarnissaanut aningaasanik immikkoortitsisoqarsimanngilaq
Naalakkersuisuusut maanna ilassutitut aningaasaliissutissanik Inatsisartut Aningaasaqarnermut Ataatsimiititaliaanut qinnuteqartariaqarsimapput.
- NunaOilimi piginneqataassutit pisussaatutut juunip 21-ani 2009 tiguagut, Palle Chrisitiansen oqarpoq.
Inatsisartut Aningaasaqarnermut Ataatsimiititaliaata ilassutitut aningaasaliissutinik akuersissuteqarnerminut atatillugu uparuarpaa, piginneqataassutinik pisinissamut ukiunilu aggertuni ingerlatsinermut aningaasartuutinut malinnaasussanut atugassanik ukioq mannamut aningaasanut Inatsimmi sillimmasiisoqarsimasariaqaraluartoq. Tamannalu Paler Christiansenip isumaqatigaa.
- Kisianni naalaklkersuisuni nuntaani paasivarput, sillimmatissanik immikkoortitsisoqarsimanngitsoq. Tassalu taamaammat ilassutitut aningaasaliissutissanik aningaasaqarnermut ataatsimiititaliamut qinnuteqartariaqarsimavugut, aningaasaqarnermut naalakkersuisoq Palle Christiansen oqarpoq.
NunaOilimi piginneqataassutit pisiarinerisa saniatigut, piginneqatigiiffiup uulisiornermik ingerlataqartup ulluinnarni ingerlanneranut Namminersorlutik Oqartussat ukiumut aningaasartuutaat, maannamut 6 millioner koruuniusimasut, marloriaatinngussapput.
- Tassalu piginneqataassutit pisiarisimaneri, NunaOilip ingerlannerata tamakkiisumik aningasalersornissaa aammalu aatsitassarsiornermut oqartussaanerup tingunerani aningaasartuutaaasussat 2010-mi aningaasanut inatsisissatut siunnersuusiornitsinni ilanngutissavagut, ingerlatsinermi aningaasartuutinik ikilisaanikkut aningaasassarsissallugit, aningaasaqarnermut naalakersuisoq oqarpoq.
Palle Christiansenip naatsorsuutigaa, NunaOilimi suliat allanngoratik ingerlaannassasut, malunnaatituaassalluni piginneqatigiiffimmi Nunatta kisimi piginnittuulernera.
