NunaOilip siulersuisui ingerlaannaq atuutilersumik tunuartut
Naalakkersuisut siulittaasuata naalakkersuisoqarfiata siulersuisunullu siulittaasup ataatsimiinnerisa kingorna, siulersuisunut siulittaasoq Frank D. Pedersen marlunngormat tunuarpoq.
Ataatsimiinnermi Nunaoil 2017-imi tapiissuteqarfigineqarnissaminik noqqaavoq peqatigitillugulu Naalakkersuisut siulittaasuata naalakkersuisoqarfia peqqullugu ingerlatseqatigiiffiup aningaasartuutimigut sipaarniuteqarnissaanik peqquneqarsimaneranik misissueqqissaartoqassasoq.
Siulersuisut tunuartut tusagassiorfinnut nalunaarutaat naapertorlugu, Naalakkersuisut siulittaasuata naalakkersuisoqarfiata sipaarniarnissamik peqqusineratigut sulisorisat affaannik soraarsitsisariaqarnermik kiisalu NunaOilimi akissarsiatigut allanngortitsisariaqarnermik kinguneqartussaavoq.
Naalakkersuisoqarfimmit naalakkerneqartutut misigisut
Naalakkersuisoqarfiup allakkiai siulersuisunit naalakkiutitut isigineqarput, siulersuisullu namminneerlutik nalilersuinissaminnut aammalu suliniuteqarnissaminnut periarfissinneqarsorinngillat.
Siulersuisunut siulittaasoq Frank D. Pedersen Naalakkersuisoqarfimmik ataatsimeeqateqarnermi kingorna siulittaasutut tunuarpoq, siulersuinullu ilaasortat sinnerisa Olav Boye Sivertsenip, Tine Parsip Naja Joelsenillu siulittaasortik taperserlugu ippassaq pingasunngornermi ataatsimeereerlutik siulersuisunit ingerlaannartumik tunuarlutik nalunaaruteqarput.
Danskit naalagaaffiata siulersuisuni ilaasortaatitaa, Peter Helmer Steen, siulersuisuniiginnassaaq, taassumali aamma siulersuisut sinnerisa isummernerannik tapersiisoq, NunaOilimi siulersuisunit tunuartut sisamaasut taama allapput.
Naalakkersuisut siulittaasuata Naalakkersuisoqarfiata aamma NunaOilip akornanni aaqqiagiinnginneq ingerlatseqatigiiffiup siorna februaarip qaammataani ataatsimeersuarnera aallartippoq. NunaOilip uuliasiorluni misissueqqissaarnissamut akuersissutinit nutaanit pissarsiarisartagaata procentit arfineq-pingasut 12,5-illu akornanniittut procentinut arfiniliinnarnut appartinneqarnissaat Namminersorlutik Oqartussanit taamani siunniunneqarpoq.
- Taama annertutigisumik annikillisaasoqarneratigut NunaOil qaqugumulluunniit sinneqartooruteqarsinnaanavianngilaq, ingerlatseqatigiiffiup pisortaa, Hans Kristian Olsen, KNR-imut taamani taama oqarpoq.
