NunaOilimik tamakkiisumik piginnittuulerneq nunatta karsianut artukkiivoq

Naalagaaffiup piginneqataassutaannik pisinerup kinguneranik nunatta karsiata amigartoorutai 532 milliuuninngorput, Atuagagdliutini taama allaaserinnittoqarpoq.

Namminersorlutik Oqartussat naalagaaffiup piginneqataassutaanik pisinikkut Kalaallit Nunaanni uuliasiorfimmik tamakkiisumik piginnittuulissapput. Nuna Oilimut aningaasartuutissat allat piginnittunit aamma akilerneqartussaapput. Piginnittut marluk, Namminersornerullutik Oqartussaasimasut kiisalu naalagaaffik marluullutik ukiumut 12 million koruuninik aningaasaliisarput. Siunissami aningaasartuutit tamakkiisumik nunatta karsianit akilerneqartalissapput. Tamanna 6 million koruuninik aningaasartuuteqarnerunermik kinguneqassaaq. Aningaasaqarnermut ataatsimiititaliap maluginianngitsuunngilaa, naalagaaffiup piginneqataassutaanik pisinermi aningaasartuutit taassumalu kingunerisaanik ukiumoortumik aningaasartuutaalersussat amerlinerat 2009-imut aningaasanut inatsimmi sillimmatitut kontomut illuartinneqartussaasimagaluartut, aningaasaqarnermut ataatsimiititaliaq akuersinermini taama allappoq. Tamanna nunatta karsianiit aningaasartuutissatut ilanngunneqarsimanngitsut ilagaat, soorlu aamma pigineqatigiiffinnut ajornartorsiortunut ikiuiniarluni aningaasaliinerit, Atuagagdliutini taamatut allaaserisaqarpoq.

Qinersinerup kingorna sapaatip akunnerini siullerni nunatta karsiata amigartoorutai 532 million koruuninik amerlipput. Royal Greenlandimut taarsigassarsititsineq piginneqataassutinillu aningaasaliinerit 503 million koruuniupput, allat 8 million koruunit Nunatta Ammerivianut aningaasaliissutaallutik. Naalagaaffiup NunaOilimut piginneqataassutaannik pisinissamut immikkut 10,97 million koruuninik aningaasaliisoqarnissaanik naalakkersuisut qinnuteqartuupput. Namminersorneq pillugu inatsimmi oqaaseqaatini nalinginnaasuni piginneqataassutinik pisinissaq naatsorsuutaavoq.