Nunaoil 1,1 millioni koruuninik sinneqartoorpoq

- Nunani allani uuliasioqatigiiffinnut sajuppillatsitsisarluni misissuinernut atatillugu Nunaoilip paasissutissanik immikkut ittunik tunisaqarluarsimanera sinneqartoornermut pissutaavoq, taama pisortaq Hans Kristian Olsen oqarpoq.

Nunarput uuliasioqatigiiffinniit ukioq 2008-mi soqutigineqarsimaqaaq, ikummatissaqarfiusinnaasunik sumiiffinni nutaani avataaneersut ujarlernissamik soqutiginninnerulersimammata.

Nunaoil A/S-imit aamma suleqataaffigineqarput, ujarlernermi akuersissutit 13-it sumiiffinni assigiinngitsuni avannaanit Sigguup Nunaanit kujammut Nunap isuanut 1.500 kilometerisut isorartussusilimmiittut.

Nunaoilip siulersuisuisa natsorsuutigaat, uuliamik gassimilluunniit iluanaarutigineqarsinnaasumik nassaartoqarnissaata tungaanut, ingerlatseqatigiiffitsik ajunaaruteqarfiusumik siunissami ingerlagallassasoq.

Nunaoil, Namminersornerullutik Oqartussanit aamma Danmarkip naalagaaffianit naligiimmik pigineqarpoq.