Nunanut piitsuunerpaanut niuernikkut isumaqatigiissutissaq isasooqqippoq
Nunarsuarmi tamarmi nunanut piitsuunerpaanut niuernikkut isumaqatigiissutissaq isasooqqippoq. EU-mit, USA-mit, Brasiliamit Indiamillu isumaqatiginninniartitat ippassaq ullunik marlunnik sioqqutsillutik ataatsimiinneq qimappaat, maannakkullu julip naaneranut piffissaliussap qaangiutinnginnerani isumaqatigiissuteqarnissaq ajornarluinnartutut isikkoqalerluni.
Septemberip aqqarngani 2001-imi peqqarniisaarniat saassussinerisa kingorna nunarsuup eqqissinarnerulernissaata anguneqarnissaanut nunarsuarmi niueqatigiineq ammanerusoq periaasissat ilagissagaat kikkulluunnit tamarmik isumaqatigiissutigissagunarpaat, taamaalillutik nunat piitsuunerusut pisuunngorniarlutik niuersinnaanngorniassammata. Nukiillu pitsaasut amerlaqisullu nunarsuarmi niueqatigiinnerup naapertuilluarnerusup pilersinneqarnissaanut sulilersinneqarput, nunarsuarmi niueqatigiinnermi suliaqatigiiffissuaq WTO ukiut arfinilinngulersut matuma siorna Doha-mi isumasiuinini aallartimmaguli. Tamatumali kingorna DOHA-mi isumaqatiginninniarnerit ajalusooqattaartuartarsimapput. Nunallu aalajangiisuunerusussat USA, EU, Brasilia, Indialu sapaatip akunnerani uani ataatsimiimmata, isumasiuinerit qaaqqusinerit naggataangajalerput, tassami qaammami tullermi USA-p præsidentiata naqisimaneqanngitsumik niuernissamut ataatsimoortumik aaqqissuussinissaminik immikkut pisinnaatitaaffia qaangiutissammat. Kongressip siunissami præsident Buship maanna amerlanerussuteqarfigiunnaagassaata niuernermik isumaqatigiissutip immikkoortortai tamaasa pillugit taasissaaq, taamaattumillu naqisimaneqanngitsumik niuernissamut isumaqatigiissutissap tamarmiusup naammassinissaa ajornarluinnassalluni. Brasilia Indialu isumaqarput ippassaq Tysklandimi isasoornermut pissutaasoq EU-p USA-llu nunalerinermut tapiissutip ilaa tamakkerlugu peerusussimanngimmassuk, taamaalillutillu nunat siuarsaniakkat nunarsuarmi niuernermut unammillersinnaanatik. Akerlianilli USA EU-lu isumaqarput tapiissutit ilanngarsimallugit aammalu nunani siuarsarniakkani siuarsimanerpaat ilaatigut Brasiliap Indiallu suliffissuarnit sulianut akileraarusiisarnertik kiffartuussinertillu annikillisissagaat, taamaalillutik nunat pisuujunerusut pissarseqataasalerniassammata.
