Nunanut allanut unammisartut angusaqarluarput

Kalaallit angutitaat assammik arsarlutik nunanut allanut unammisartut, Amerikap nunavittaani assammik arsarluni unammersuarnernut Chilemi pisussanut peqataajartortinnatik, sungiusaatigalugu ippassaq unnukkut unammigamik angusaqarluarput.
Allattoq Karsten Sommer
juunip 10-at 2010 05:16

Nunanut allanut unammisartut Frankrigip kujataani Nicemi sungiusarlutik piareersarput, Frankrigimilu assammik arsartartuni ukiuunerani unammisaqattaarnerni normu 4-nngorsimasut, St. Raphael-imeersut, ippassaq unammivaat.

Timersoqatigiit Kattuffiata nittartagaani oqaatigineqarpoq, Kalaallit Nunaat 30-31-mik ajorsaraluarluni unammilluaqisoq.

Timersoqatigiit Kattuffiata nittartagaani oqaluttuarineqarpoq, unammisut naligeeqisut - Minik Dahl Høeghilu unammilluarnermigut aqqaneq-marlunnik isertitaqartoq, aamma måliniittoq Inuk Højgaard annaassillualaavittartoq oqaatigineqarpoq.

Assammik arsarlutik nunanut allanut unammisartut, Frankrigimeersunut holdinut angusarissaartunut allanut ullumi unammeqqissapput.

Amerikap nunavittaani assammik arsarluni unammersuarnerit juunip 22-anniit 26-annut Chilemi ingerlanneqartussaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq