Nunanut allanut unammisartussaqqissut Danmarkiliassapput

Inuusuttut sulorartartut Danmarkimi misiligarneqassapput siunissaq ungasinnerusoq eqqarsaatigalugu nunanut allanut unammisartunut piukkunnaateqarnerlutik.

Sulorartartut arlallit nuna tamakkerlugu sungiusaasup qissimingaalereerpai. Aasamulli Island Games-eqarnissaanut peqataasussat aatsaat toqqarneqarumaarput porskimi Nuummi GM-qareerpat.

Nuna tamakkerlugu sungiusaasoq Bjarne Nielsen inuusuttunik sisamanik toqqaavoq Danmarkimut sungiusariaqartinneqartussanik. Imaanngilarli Island Gamesimut toqqagaanissartik qulakkeeraat, periarfissaqarpulli siunissaq ungasinnerusoq eqqarsaatigalugu nunanut allanut unammisartunut piukkunnartuunertik takutissallugu.

- Nunanut allanut unammisartoqarneq eqqarsaatigalugu piffissaq ungasinnerusoq isigalugu pilersaarusiortariaqarpugut. Taamaattumik inuusuttut sisamat toqqarsimavakka martsimi Danmarkimut sungiusariaqartussatut, taama Bjarne Nielsen KNRimut oqarpoq.

Toqqarneqartut tassaapput Jens Frederik Nielsen, Taatsi Pedersen, Hedvig Broberg aamma Sara Lindskov Jacobsen.

- Inuusuttut taakku ineriartupiloorput assullu pissanngatigaara killiffiisa takunissaa, taama Bjarne Nielsen oqarpoq.

Unammisartut ataasiakkaat qulakkiikannereerpaat nunanut allanut unammisartunut peqataanissartik. Tassaapput Mille Kongstad Danmarkimi najugaqartoq aamma angutini unammisartut Frederik Elsner aamma Bror Madsen.

- Eqqarsaataavoq Bror Madsenip aamma Frederik Elsnerip Island Games sioqqullugu Islandimut unammiartornissaat. Aamma sulissutigaarput upernaap ingerlanerani Mille Kongstadip nunat tamalaat unammineranni arlaanni peqataanissaa, taama Bjarne Nielsen oqarpoq.

Island Gamesimut peqataasussat qulit toqqarneqartussaapput. Kalaallit peqataassapput ataasiakkaarluni unamminermi aamma holdikkaarluni unamminermi.

- Misilittagartuut soorlu Juliane Brønlund aamma Mininnguaq Kleist suli ingerlalluarput. Taamaattumik pissanngatigaara inuusuttunit nunanut allanut unammisartuunerminnit illikartinneqarsinnaajumaarnersut, taama Bjarne Nielsen oqarpoq.

Kalaallit 2009-mi angusaat

Ukiut marluk matuma siorna kalaallit holdikkaarnermi sølvinnapput finale-mi Savalimmiut ajorsarfigalugit. Frederik Elsner angutit ataasiakkaarneranni pissartannngorpoq finalemi Bror Madsen ajugaaffigalugu. Frederik Elsner aamma Mininnguaq Kleist angutit iligiiaarneranni sølvinnapput.

Arnat ataasiakkaarneranni Mille Kongstad sølvinnappoq aammalu arnat angutillu iligiiaarneranni Bror Madsen bronzennaqatigalugu.

Kredsmesterskabit

GM-imut piareersaatitut kredsmesterskabit avannaani Nuummilu ingerlanneqareersimalerput. Angusat takusinnaavatit ataani linki toorlugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat