Nunanut allanut tunngasumik nassuiaat saqqummiunneqassaaq
Inatsisartut ukiuunerani ataatsimiinnerat nalunaaqutaq ataatsimut nanginneqassaaq. Tamatumuuna oqaluuserisassat immikkoortorpassuaqanngillat marlulli nunatsinnut pingaarutillit oqaluuserineqassapput. Peqqissutsimut naalakkersuisoq Asii Chemnitz Narup inuunerinnerulernissarput pillugu nassuiaateqassaaq tamannali pitinnagu nunanut allanut naalakkersuisup Josef Motzfeldtip Nunanut Allanut Tunngasunik nassuiaatini saqqummiuteqqaassavaa:
Aningaasaqarnermut nunanullu allanut tunngasunut naalakkersuisup nassuiaataa nunatta nunanut allanut assigiinngitsorpassuartigut attaveqarneranik niueqateqarneranik suleqateqarneranillu imaqarpoq.
Nunatta avammut tunisassiornerani kinguppaat isertitsissutiginerpaasarpagut. Avammut tunisassiorneq tamaat isigissagaanni 60 procentit raajanik tunisaqarnermit iluanaarutaasarput.
Nunatta EU-mut aalisarnikkut isumaqatigiissutaa nutarterneqartussaavoq, isumaqatigiinniarnerillu upernaaru maajimi Ilulissani naggaserneqassapput.
Tuluit Nunaat raajanik aalisakkanik, savanik, puisillu amiinik nunatsinneersunik pisiaqarluartartuuvoq. Nunarput Tuluit Nunaannut nioqquteqarnikkut siorna katillugit 21 million koruuninik iluanaaruteqarpoq. Ukioq 2002-imi Tuluit Nunaannut nioqquteqarneq 41 million koruuninik isertitsissutaasimalluni. Tamanna pillugu Tuluit Nunaanni nunatta tunisassiaanik qaammatip tulluani nittarsaassisoqassaaq. Nittarsaassinissami tuluit nunatta aalisagaanik raajaanillu pisiaqarnerulersinniarneqassapput, tamatuma saniatigut nunatsinnut takornariarnissamut aamma pilerisaarneqassallutik.
Tuluit Nunaannut tunisaqarnerulernissap saniatigut nunatsinni suliffeqarfiutillit avammut tunisassiornikkut periarfissarissaarnerulernissaat EU-millu aalisarnikkut isumaqatigiissuteqarnissaq ukioq manna naammassiniagassanut ilaapput.
EU-mik aalisarnikkut isumaqatigiissutissaq ukioq 2013-ip tungaanut atuuttussaq, nunatsinnut ukiumut 320 million koruunit naliginut iluaqusiisartussaavoq.
