Nunanut allanut politikkimut Kalaallit Nunaat oqartussaassuseqarnerorusuttoq

Kalaallit nunanut allanut tunngasutigut pisinnaatitaanerunissamik Danmarkimillu sinniisoqaratik nunanut allanut tunngasutigut oqartussaassuseqarnerunissamik kissaateqarput.

Kalaallit Nunaannit Folketingimut qinigaarlaaq Naaja Nathanielsen, IA-meersoq, DR-imut taama oqarpoq.

- Nunanik allanik ataatsimeeqateqarnermi nammineersinnaanerput pingaaruteqarpoq, tusagassiutinut oqarpoq, Kalaallit Nunaatalu nammineq politikkiminik ingerlatsinissamut pisariaqartumik oqartussaassuseqartinnissaa pineqartoq nangilluni.

Tunngaviusumik inatsit namminersornermullu inatsit naapertorlugit danskit naalakkersuisui naalagaaffeqatigiinneq sinnerlugu nunanut allanut tunngasunik akisussaaffeqarput.

Nunanut allanut tunngasutigut oqartussaassuseqarnerulernissamik kissaat Atlantikup avannaani Folketingimut ilaasortat Danmarkimi naalakkersuisunngortitsiniartumik Mette Frederiksenimik marlunngornermi ataatsimeeqatiginninnginnerini saqqummiunneqarpoq.

Isumaqatiginninniarnerit ingerlasut

Danmarkimi naalakkersuisunngortitsiniarnerit tallimanngormat aallartipput.

Tassani partiit arfineq-marluk ministeriunerup ministeriaqarfiani Mette Frederiksenimik ataatsimeeqatiginnipput.

Taakku tassaapput SF, Enhedslisten, De Radikale, Alternativet, Moderaterne, Venstre aamma De Konservative.

Naalakkersuisunngortitsiniarluni isumaqatiginninniarnerit ministeriunerup atorfilittut inigisaani Marienborgimi marlunngornermi pingasunngornermilu nanginneqassapput.

Ministeriugallartup Mette Frederiksenip ilaasortat Atlantikup avannaaneersut, tassa kalaallit marluk saniatigut Savalimmiormiut marluk, marlunngornermi ullaap tungaani ataatsimeeqatigissavai.

Tamatuma saniatigut Enhedslisten Mette Frederiksenimik marlunngornermi ataatsimeeqatigineqassasoq, partiip TV 2-mut marlunngornermi ullaakkut ilisimatitsissutigaa.

Partiip ilisimatitsinera naapertorlugu tamanna nalunaaqutaq 14.00 Marienborgimi pissaaq.

Nunanut allanut politikki pingaaruteqartoq

USA-p præsidentiata Donald Trumpip Kalaallit Nunaata tiguarneqarnissaanik sioorasaariuarneranut atatillugu kunngeqarfiup nunanut allanut politikkia Kalaallit Nunaannut immikkut attuumassuteqarpoq.

Nunanut allanut naalakkersuisuusimasoq Vivian Motzfeldt (S) USA-mik isumaqatigiinngissuteqarnermi aallartitatut inissisimaffeqarpoq.

Danmarkip nunanut allanut ministeria Lars Løkke Rasmussen (M) peqatigalugu januaarimi Washington D.C.-miippoq.

Tassani USA-mi præsidentip tullersortaa J.D. Vance nunanullu allanut ministeri Marco Rubio naapippaat.

Naaja Nathanielsen ataatsimiinnerup taamaattup assersuutigalugu Lars Løkke Rasmussen peqataatinnagu taamaalillunilu danskinit aallartitaqartinnagu ingerlanneqartariaqarsimaneranik isumaqarnersoq, allaaserisami ersersinneqanngilaq.

Qarsoq Høegh-Dam Naleqqameersoq Kalaallit Nunaat sinnerlugu folketingimi aamma ilaasortanngorpoq.

Kalaallit Nunaata ataatsimik nipeqarluni piumasaqaateqarlunilu danskit naalakkersuisussaannut, qanorluunniit isikkoqaraluarpata, saqqummiussinissaa naatsorsuutigalugu siusinnerusukkut taassuma oqaatigaa.

/Ritzau/