Nunanut allanut politikertik allanngortikkusuppaa
Tuluit ministeriunertaavata Gordon Brownip nunanut allanut politikertik allanngortikkusuppaa. USA-p innutaasa uparuartuutaannut naleqqunnerusunngortillugu. Taamatut ersarissumik nalunaaruteqarneq siulleq pivoq unnuaq oqalugiartoqarmat.
Tuluit Niuernermut Ineriartortitsinermullu ministeriat Douglas Alexander Washingtonimi oqalugiartuuvoq.
Pingaarnertut oqariartuutaa tassaavoq nutaamik iligiiliornissamut maannakkut piffissanngortoq.
Kaammatuutigaalu USA-p pingaarnersiuilluni tulleriiaakkani allanngortitissagai, nunallu tamat piumasaqaataannut samminerulertariaqartoq.
Tuluit oqariartuutaat præsident Bush uparuartorneqartarnerpassuinut sammissuteqartutut paasineqarput, isummammi nunanit allaneersut USA-mit tusaaniarumaneqarneq ajormata.
Takutitsinerusariaqarpugut Douglas Alexander oqarpoq, nangillunilu, allat isumaannut mattussiniartuunngilagut nunalliuku tamat isumaannut qaninnerulertariaqartugut.
Ingerlatitaanitsinnilu pisuussutigut tassaapput tunngaviusumik atukkavut immikkut ittumik soqutigisagut kisiisa aallunnagit.
Gordon Brown, ministeriunertut taarsikkani Tony Blair assiginagu, præsident Bushimut unarusaartuunianngilaq, imaanngikkaluarporli amerikamiunik nuannarisaqartuunngitsoq.
Nunalli taakkua marluk akornanni naliginnaasumik tuluttut oqaaseqarfiusuni attaveqaqatigiinnerit ingerlaannarnissaat attattuarumavaa.
Attaveqaqatigiittuarnissarli kisimi naammanngilaq.
Silinnerusumik atitunerusumillu siunniussisariaqarpugut taama oqarpoq Douglas Alexander.
Gordon Brownillu ilaasortaaffitsik EU-mi maannakkornit sakkortunerusumik attaveqarfiginiarpaa, taamatuttaaq aamma Kina Indialu Asiami nunat taakkua siunissami attaveqarfigiumavai.
Tassalu Tuluit naalakkersuisortaavisa ullut 14-it qaangiutiinnartut siullerpaamik nunanut allanut tikeraaqqaarnerminni siullermik oqalugiaataat taamatut nipeqarpoq, Douglas Alexanderillu, Gordon Browni qanimut suleqatigilluartuummagu Douglas Alexander oqalugiaataa pimoorullugu tusarnaaqqissaarneqarpoq.
2000-ikkunni qanoq aseruisinnaatigineq uuttuutiginiarneqartarpoq 2100-kkunnilu qanoq annertutigisumik sanaartorsinnaaneq ataatsimoorullugu uuttuutiginiarneqartassaaq.
Oqariatuut tassaavoq USA-p siunissami nunanut allanut saamasaarniarnerunissaq akuerisariaqaraa. Nunat tamat piumasaat malinniarnerusariaqarai soorlu Naalagaaffiit Peqatigiit Kattuffiat aqqutigalugu.
Tuluit præsident Buship isumaanut ungasinnertik oqariartuutigaat ullualunnguillu qaangiuppata tuluit USA-mut tikeraartussaapput.
