Nunanut allanut ministeri Tartupaluk pillugu: Isumassarsiaq nutaaliorneruvoq
Siunnersuuteqartut tassaapput ilisimatuut marluk, Canadameersoq Danmarkimeersorlu. Taakku isumaqarput qeqertaarannguaq inoqanngitsoq Nunatta Canadallu akornanniittoq nunanit pineqartunit naligiimmik oqartussaaffigineqartariaqartoq.
- Piffissami sivisuumi ajornartorsiutaasimasumut nutaaliorluni aaqqiissutissatut isigaara. Aamma inuit tamatumunnga tunngatillugu nutaanik eqqarsarnerat pitsaasutut isumaqarfigaara. Taamatullu aaqqiissuteqarsinnaaneq sumiiffinni allani atorneqarsinnaappat, soorlu Kangiata imartaani Kinap saqitsaassuteqarfigisaani, tamanna pitsaassagaluarpoq, Kristian Jensen KNR-imut taama oqarpoq.
AAMMA ATUARUK Olsvig: Tartupaluk Inuit Nunaattut isigineqalerli
Qeqertaaqqap kimit oqartussaaffigineqarnera kunngeqarfiup Danmarkip Canadallu ukiuni qulikkuutaani arlalinni assortuussutigaat.
Qeqertarlu pinngortitami pisuussuteqanngikkaluartoq issittumi naalagaaffinnut allanut erseqqissumik oqariartornerussaaq Issittumi akerleriissutaasut allat aamma eqqisseqatigiiffiusumik aaqqiissuteqarfineqarsinnaasut, ilisimatuut taama isumaqarput.
Aamma atuaruk Ilisimatuut: Tartupaluk Nunavut Kalaallit Nunaatalu ataatsimoorullugu piginiarlissuk
Tamannali Kristian Jensenip qularaa.
- Suut akerleriissutaasut isumaqatigiissutigineqarsinnaanerannik takutsinerussasoq isumaqataaffigaara. Issittumili akerleriissutaasunut tamanut tunngatillugu aaqqiissutaasinnaassanersoq qularaara. Tartupaluummi eqqaani pisuussuteqarpallaanngikkaluartoq Issittumi pisuussuteqarpassuaqarpoq pissanganartunik, taakkulu nunarpassuit oqartussaaffigissallugit soqutigisupilussuuaat.
Aamma atuaruk ASSIT Tartupaluk pillugu siunnersuut nuannaarutigineqarlunilu quiasaarutigineqartoq
Siunnersuut Aarhusip Universitetiani Issittoq pillugu ataatsimeersuarnermi ippassaq saqqummiunneqarpoq. Inuit Ataqatigiit siulittaasuata Sara Olsvigip siunnersuummut akissuteqarluni siunnersuutigaa qeqertaq naggueqatigiit Inuit ataatsimoorullugu pigisariaqaraat.
