Nunanut allanut ministeri: Atomip nukinganik sakkussianik Issittumi atuisoqannginnissaanik suli tapersersuisuuvunga
Nunanut allanut ministerip Berlingske Tidendemit apersorneqarluni danskit naalakkersuisuisa Issittumi atomip nukinganik sakkussianik tamanik atuisoqannginnissaanik pimoorussamik sulissuteqarnerminnik, naak tamanna naalakkersuisooqatigiit toqqammavissaanni allassimagaluartoq, unitsitsisimanerannik oqarsimanera, pingaartumik Sara Olsvigip IA-meersup Christian Juhlillu Enhedslistenimeersup oqallittoqarnerani uggoralugu oqaatigaat.
- Isuma taanna suli tapersersorpara, nunanulli tapersersuisutsinnut tunngatillugu tamatuma piviusorsiortuunera aamma nalilersortariaqarsimavarput. Nunarsuarmimi kisiartaalluta taamatut anguniagaqartuunissarput tulluarpallaanngilaq. Nunanilli allanit, soorlu nunanit avannarlernit, taperserneqarsinnaagutta isuma taanna naleqquttuussaaq, Holger K. Nielsen oqarpoq.
De Radikalet Illersornissaq pillugu oqaaseqartartuat, Zenia Stampe, isumaqarpoq Issittoq atomip nukinganik sakkussianik atuiffissanngitsoq, Issittorlu USA-p Ruslandillu aqqartartuinik atomip nukinganik sakkussianik sakkulersukkanik angallavigineqassanngitsoq.
