Demokraatit: Tikisitanik isumalluuteqarniarneq navianartuuvoq
Nunanit allanit suliartortitat Nunatsinni sanaartornerup ingerlaavaannarnissaanut iluaqutaasussaassasut, Naalakkersuisut Demokraatit siulittaasuannut akissuteqarput.
Demokraatilli siulittaasuat isumaqarpoq, nunanit allanit sulisussanik tikisitsiortoqalissappat, Nunatsinni sanaartugassat utaqqisinneqartut qaleriiaatsiinnalissasut.
- Nunatsinni namminersortut assigiinngitsut ilaatinneqartariaqarput taavalu aamma innaallagissiortunik, sanasunik assassornerullu iluani sulisinnaasunik ulikkaarpugut, Randi Vestergaard Evaldsen oqarpoq.
AAMMA ATUARUK Mittarfiit allamiunik sulisoqarluni sanaartorneqassasut
Naalakkersuisut eqqartornerusariaqaraat
Nunatsinni mittarfiit tallilerneqalerpata tamanna nunatsinni sanaartugassanik allanik kinguartiterisoqannginnissaa Naalakkersuisunit qanoq isumannaarneqassanersoq, Demokraatit siulittaasuata paragraf 37 naapertorlugu apeqquteqaatigaa.
Naalakkersuisut apeqquteqaammut akissuteqarnerminni oqaatigaat nunanit allanit suliartortitat sanaartornerup ingerlaavaannarnissaannut iluaqutaasussaassasut. Naalakkersuisullu taama akissuteqarnerat Demokraatit siulittaasuanut nuannaajallatsitsinngilaq.
- Suna tamarmi ataatsikkut sanaartorneqarsinnaanngilaq. Sanaartugassat inerisagassallu angisoorujussuupput, taamaammat mittarfinnut Siorarsiorfimmullu tunngasut pilersaarusioqqissaartariaqarpagut.
Naalakkersuisullu eqqartuinissaminnut suli periarfissaqartut, Vestergaard Evaldsen nangilluni oqarpoq.
- Eqqartorsinnaasariaqarparput oqaloqatigiissutigalugulu suut aningaasaqarnitsinnut massakkut iluaqutaassanersut qanorlu pingaarnersiuissaagut.
Mittarfiit arlallit ataatsikkut tallilernangit ataasiakkaarlugit suliarineqarpata pitsaanerussasoq, SIK-p siulittaaasuata, Jess G. Berthelsenip oqaatigisaa, Demokaatit siulittaasuata isumaqatigaa.
- Uani oqaatigineqarpoq nunanit allaninngaanneersut isumalluutigineqassasut siullermeerlugit. Isumaqarpugut taanna navianartuusoq aamma kukkunerusoq, nunatsinnimi sulisinnaasut sulisussaapput.
Mittarfiit tallilerneqarnissaannut suliarinnittussarsiuussinermi nunanit allaneersut sulisinneqalissagaluarpataluunniit, nunatsinni sulisinnaasut salliunneqassasut, Demokraatit siulittaasuata kissaatigaa.
- Siunertaajuaannartariaqarpoq nunatsinni sulisinnaasut sulilersinnissaat, isumaqarpugullu isumaqatigiinniarnermi tamanna siulliunneqartariaqartoq salliunneqarlunilu, Demokraatit siulittaasuat Randi Vestergaard Evaldsen oqarpoq.
