Nunanit allanit nutaarsiassat
Kunngissaq Frederik Beijingimi OL-ip
ammarnersiornissaanut ilaassamaartoq, kunngikkormiut atorfilittaat nalunaarput.
Kunngissaq persuarsiornernut ilaanngikkaangami OL-imut ataatsimiititaliami, nunanit tamanit sinniisuuffigineqartumi ataatsimeeqataasassaaq, ataatsimiitaliami tassani ilaasortanngorsinnaanissaminut piukkunneqarnerussagami. Kunngissap nulia, Mary aamma persuarsiornerit ilaanni peqataasassaaq.
Danmarkimi naalakkersuisut, partiillu timersorneq pillugu oqaaseqartartui aamma OL-ip ammarnersiorneqarnerani peqataassapput.
...
OL eqqartortillugu oqaatigisinnaavarput, Kina-mi illoqarfiit pingaarnersaanni, Beijingimi silaannarmik mingutsitsineq millisarniarneqaleruttormat. Taamaalilluni ullumimiit biilit normuisa naggataat naapertorlugit ulloq allortarlugu bilersinnaatitaalerput, tassa 1-imik, 3-mik, 5-imik, 7-imik 9-milluunniit naggatillit qaammatip aallaqqaataaniit ulloq allortarlugu bilersinnaalerput, normuli kingulleq 2, 4, 6, 8 imaluunniit 0-iuppat qaammatip ulluisa aappaanniit ulloq allortarlugu biilersinnaatitaalerput. Taakkua saniatigut suliffeqarfippassuit, soorlu saviminiliorfiit assigiinngitsut, nukissiorfiit inissialiortullu OLeqarnerata nalaani unitsinneqarallarput. Silaannaap mingoqannginnerulernerata saniatigut Kina-p aamma takutinniarpaa silap pissusaata allanngoriartorneranut akisussaaqataalluni tamannalu iliuuseqarfigerusullugu.
...
Australiamiut timmisartortitseqatigiiffiata ‘Qantas’-ip timmisartuisa ilaat Londonimit Australiami illoqarfimmut Melbournemut ullumi ingerlaartilluni Filippinerini Manilamut ajutuulerluni nunnittariaqarsimavoq.
Ilaasut timmisartumilu inuttat timmisartumi nipimik eqqumiitsumik tusaasaqarsimapput, tamatumalu kinguninnguagut qaarpallattumik nipitoorujussuarmik tusaasaqarput, silaannalersuutillu issiaviit qulaaniittut nakkakaallutik, taava timmisartoq appariartupiluulerpoq siutivullu milillutik, timmisartumi ilaasut ilaat oqaluttuarpoq.
Ajutuulernermi minnerup kingornagut, timmisartoq putusimasoq ilaasut takusinnaavaat.
Ilaasut 346-uusut timmisartumit anigamik, timmisartoq nassataasivimmi nalaatigut meterinik pingasunik takissusilimmik meterinillu marlunnik silissusilimmik putusimasoq takuaat.
Ajutuulerluni minnermi ajoqusertoqanngilaq. Timmisartortitseqatigiiffik ‘Qantas’ nunarsuatsinni timmisartortitseqatigiiffiit isumannaannersaattut isigineqartarpoq.
...
Amerikami Demokratit præsidentimut qinigassanngortitaat Barack Obama angalanermini maanna Parisimut aqqusaarpoq, franskillu præsidentiat Nicolas Sarkozy naapisimaassallugu.
Fanskit aviisiata ‘Le Figaro’p Sarkozy Amerikamiu præsidentimut qinigassanngortittoq pillugu ima oqarsimanerarpaat: “Obama tassaavoq kammassuara”.
‘Hillary Clinton siunnersortima ilimagisorujussuugaluaramikku. Uangali oqarfigiuarpakka Obama qinigaassaqqaartoq’, Sarkozy aviisimi taama issuarneqarpoq.
Obama Parisimeereeruni Londoniliassaaq, tuluillu ministeriunerannut Gordon Brownimut neriartoqqusaasimasoq oqaatigineqarpoq.
...
Indiami illoqarfimmi qarasaasiaqarfiunerpaami Bangaloremi qaartartut arfineq marluk ullumikkut qaartinneqarput. Qaartartumeerinerni ataaseq toqutaasoq, 15-illu ikilerneqartut, nutaarsiassaqartitsivimmi Reutersimi allaaserinnittoqarpoq. Qartartut piffissakkut aalajangersimasukkut qaartussiat qaartinneqartut tamaani politiit oqaatigaat.
Bangalore suliffeqarfinnit Indiap avataaneersunit nunanit allamiut suliffeqarfiutaannit nuuffigiumaneqarluartuuvoq, soorlu suliffeqarfiit ilaatigut tassaallutik IBM, Microsoft aamma Intel. Qaartartumeerinernut suna patsisaanersoq ilisimaneqanngilaq.
