Nunani tamalaani Issittup ukiui naggaserpaat
Nunani tamalaani Issittup ukiuisa naggaserneqarneri malunnartinniarlugit ataatsimeersuartoqassaaq. Matumanimi ukioq ataasiinnaq pineqarani ukiut pingasut-sisamat pineqarmata, taakkulu ukiorpassuarni pingaaruteqartussaallutik.
Issittup ukiuisa atuunnerini, issittumi ilisimatusarneq nunarsuarmi tamarmi sammineqarpoq. Nunat tamalaat akornanni suleqatigiissutissatut pilersaarutit angisuut ingerlanneqarlutik, tamatumalu saniatigut suliniutit minnerusut amerlaqisut, Sikuiuitsup Avannarliup Kujalliullu ilisimaneqarnerulerneranik paasisaqarfigineqarneruneranillu suliniuteqarfiusut, ingammillu silap pissusaata allanngoriartornerata kingunerinut tunngasut naammassineqarlutik.
Nunat Tamalaat Issittumut ukioqartinneqartarnerat, ukiut 50-it qaangiukkaangata pisarpoq.
Ilisimatuut 2.500-t Montrealimut ullumi tikerarput. Ilisimatusarnermi paasisat sapaatip akunnerani tulliuttumi saqqummiussuunneqassapput. Ataatsimeersuarnerup matuma ataatsimeersuarnerillu ilisimatusarnermut tunngasut angisuut allat assiigiinngissutaat tassaavoq, qangaaniilli ilisimasat aamma nunat inoqqaavi, pingaartumik naggueqatigiit Inuit, suliniutini aamma ataatsimeersuarnermi matumani pingaarutilimmik inissisimammata.
Nunat Tamalaat Issittumut ukioqartinneqartalermatali aatsaat siullerpaamik ilisimatuussutsikkut misissuinerit kisimik pinnatik inuiaqatigiinni pissutsit aamma nunani innuttaasut inuuniarnikkut atugaat aamma pingaartinneqarput.
Nunatsinnit peqataatitaqartut tassaapput Namminersorlutik Oqartussat, ICC, Ilisimatusarfik aamma Pinngortitaleriffik, soorlu aamma Folketingimit peqataasoqartoq.
Pingaarnertut oqalugiartussat tassaapput Norgemi ministeriunerusimasoq Gro Harlem Brundtland aamma ICC-p siulittaasua Aqqaluk Lynge.
Taamaalilluni Montrealimi ulluni aggersuni pisussat soqutiginarluinnartussaapput, ilaatigummi ilinniagaqartut Montrealimeersut 150.000-iusut, ilinniarnerminnik unitsitsillutik ataatsimeersuarfiusumik ungusillutik, akikinnerusumik pitsaanerusumillu ilinniartitaanissartik piumasaralugu isummaminnik nittarsaassissammata.