Nunani Avannarlerni ministeriunerit sisamat ippassaq ataatsimiipput - Ark'alo Abelsen aamma peqataavoq

Nunat Avannarliit Siunnersuisoqatigiiffiata ataatsimiinnera Norgemi ippassaq ammarmat Nunani Avannarlerni ministeriunerit sisamat ataatsimiipput, Avatangiisinut Naalakkersuisup, Ark’alo Abelsenip, aamma peqataaffigisaanik.
oktobarip 30-at 2007 07:18

Danmarkimi qineqqusaarneq pissutigalugu ministeriuneq Anders Fogh Rasmussen peqataasinnaanani nalunaarsimavoq.

Ministeriunerilli ataatsimiittut sisamat taakku isumaqatigiissutigaat silap pissusaata allanngoriartornera pillugu Danmarkimi aappaagu ataatsimiinnissami suleqatigiinniarlutik.

Sverige EU-mut ukioq 2009-mi siulittaasuusussaavoq, taamaammat silap pissusaata allanngoriartornera pillugu Københavnimi ataatsimiittoqalerpat Nunat Avannarliit aamma sunniuteqarsinnaassapput, soorlu ullormut oqaluuserisassanik siunnersuuteqarsinnaassallutik.

Norgemi ministeriuneq Jens Stoltenberg oqarpoq, silap pissusaa pillugu isumaqatigiissutissaq Kyoto-mut isumaqatigiissummut naleqqiullugu sukannernerullunilu annertunerusariaqartoq.

-Nunat amerlanerit peqataasariaqarput, silaannaallu kissatsikkiartornerata gradinit marlunnit annertunerunnginnissaa anguniartariaqarparput, Jens Stoltenberg oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq