Nunani avannarlerni kiffaanngissuseqarluni nuttarsinnaanissamut aqqutissiuussiniartut
Siunnersuisooqatigiit nunanit avannarlernit tamanit, Kalaallit Nunaat, Savalimmiut Ålandilu ilanngullugit kiisalu Nunat Avannarliit Siunnersuisooqatigiivinit aamma Nunani Avannarlerni Ministerit Siunnersuisoqatigiiffianit ilaasortaaffigineqartussaq siorna Nunat Avannarliit Ataatsimeersuarneranni aalajangiiffigineqarpoq. Ilaasortallu siullerpaamik ataatsimeeqqammerput.
Nunani avannarlerni killeqarfiit pitarlugit kiffaanngissuseqarnerusumik nuttarsinnaanissap sulissutigineqarnissaa eqqarsaataavoq. Siunnersuisooqatigiit killeqarfinnik ajornartorsiutaasut 3-5-t ukiut tamaasa sammisassavaat. Anguniagaasorlu tassaavoq peqatigiillutik killeqarfinnik ajornartorsiutaasut 5-10-t ukiumoortumik iluarsiivigisassagaat - iluarsiivigalugit iluarsiivigineqarsinnaanngippatalu tamanna innuttaasunut paasissutissiissutigalugu.
- Killeqarfiit pitarlugit nuttarsinnaaneq nunat soqutigisariaqarpaat, taamaattoq aamma piviusorsiortariaqarpugut. Nunat avannarliit nunaannaanngilaq aamma Killeqarfiit ajornartorsiutaasinnaanerini pillugit siunnersuisooqatigiit aalajangiisinnaassuseqarlutik sulinngillat. Sorpassuilli suleqatigiissutigisinnaavagut, siunnersuisooqatigiit oqaaseqartartuat Siv Friðleifsdóttir oqarpoq.
Peqatigitillugu killeqarfinnik ajornartorsiutaasinnaasut nunat atlantikup avannaamiut Folketingimi ilaasortaatitaasa suleqatigiissutigisinnaavaat. Ilaasortaatitammi taakku sisamaasut Naalagaaffeqatigiit iluanni killeqarfinnik ajornartorsiutaasut aaqqissuussaasumik akiorniarnissaannut peqatigiillutik inatsisissatut siunnersuuteqarput. Inatsisissatut siunnersuut marsip 28-iani siullermeerneqarluni suliarineqassaaq.
