Nunani avannarlerni illoqarfiit pingaarnersaat COP21-mut ataatsimoorlutik nalunaaruteqarniartut
Silap pissusiata allanngoriartorneranut illoqarfiit pingaarnersaasa qanoq iliuuseqarnissaat ukiormanna pingaarnerutut sammineqarpoq.
Nunani Avannarlerni illoqarfiit pingaarnerit ataatsimoorlutik nalunaaruteqarniarput, taannalu ataatsimeersuarnermi suliaralugu aallartinneqarpoq, kingornagullu Naalagaaffiit Peqatigiinni silap pissusiata allanngoriartornera pillugu ukiamut ataatsimeersuartoqalerpat COP21-imi pisussamut nassiunneqassalluni.
Ataatsimoortumik nalunaarutissap suliarineqarnerata saniatigut attaveqaqatigiinnermi, angallannermi, avatangiisinut sillimaniarnermullu suliniutinut assigiinngitsunut kajumissaasiisoqarpoq.
- Ataatsimeersuarneq pissarsiffiulluaqaaq, Nunani Avannarlerni Illoqarfiit Pingaarnersaasa akornanni attaveqaqatigiinneq nukittorsarneqarluni, suleqatigiiffissarpassuarnillu pilersitsiffiulluni, angalaqatigiinni aqutsisoq Mille Søvndal Pedersen (IA), tusagassiorfinnut nalunaaruteqarluni taama allappoq.
Tassuma saniatigut ataatsimeersuariaqataallutik angalaqataapput Martha Abelsen (S) aamma Ane Egede Mathæussen (S).
Ataatsimeersuarneq naammassimmat, Nunat Avannarliit Killiit Illoqarfiisa Pingaarnersaasa Aningaasaateqarfianni Reykjavikimi, ataatsimiititsiffiusumi sapaammi aamma ataatsimiigiartoqarpoq. Nunat Avannarliit Killiit Illoqarfiisa Pingaarnersaasa, Reykjavikip, Torshavnip aamma Nuup, takornariaqarneq aammalu takornariaqarnermi kulturikkut inissisimaneq takornariaqarnerullu aningaasaqarnermut sunniutai ataatsimiinnermi tassani sammivaat.
