Nunamut isernissamut inerteqqummik peqqussuteqaqqinnialersaartoq
USA-p præsidentiata Donald Trumpip oqaatigaa nunap killeqarfiisa illersorneqarnissaat siunertaralugu peqqussummik nutaamik sapaatit-akunnerata tulliani atsiugaqassalluni.
Trumpilli kisimiilluni tusagassiortunik sisamanngormat katersortitseqqaarnermini peqqussutissaq qanoq imaqassanersoq oqaatiginngilaa.
USA-mi inatsisinik atortitsinermut ministereqarfiup ilisimatitsissutigaa præsidentip nunamut isernissamut inerteqqut assortuussutaasoq peqqussummik allamik "allanngortitingaatsiakkamik siunissami qaninnerpaami" taarsernialersaaraa, nutaarsiassaqartitsivik Reuters taama allaaserisaqarpoq.
Peqqussutip atorunnaarsikkallarnissaanik aalajangernerup allanngortinniarnissaa Trumpip naalakkersuisuisa taamaatiinnarniaraat, ministereqarfik nalunaarpoq.
Nunamut isernissamut inerteqqutaasoq assortuussutaaqisoq Trumpimit januaarup 27-ani atsiorneqarpoq, kingornalu nunani tamalaani annertuumik isornartorsiorneqarpoq amerikamilu eqqartuussivinnit atorunnaarsikkallarneqarluni.
Trumpip Præsidentip Illorsuani sapaatit-akunnerini siullerni sisamani aalajangiinerit malunnaateqarnerpaat siuariaataalluartutullu taasani tusagassiortunik sisamanngornermi katersortitsinermi oqaluttuarai.
- Inuiannut amerikamiunut toqqaannartumik oqaatigissavara tusagassiuutit eqqortoq tamatigut oqaluttuarineq-ajoraat. Tusagassiuutit tatigisassaajunnaarsimapput, præsidenti taama oqarpoq.
Tusagassiortunik katersortitsinerup ilarujussua tusagassiuutinik "unneqqaserluttunik" "uumisuttunillu" isornartorsiuinermut atorneqarpoq.
Trumpip ilaatigut oqaatigaa USA-mi ajornartorsiuterpassuit nammineq takusinnaasani maanna aaqqiissuteqarfigilereerlugit.
Ilaatigut amerikamiut suliffeqarfiutaat nunanut allanut nussorneqarsimapput peqqarniisaarniaqatigiillu Islamisk Statimeersut suli ajorsartinneqaratik.
- Suliassarpassuit tukattupilussuit kingornuppakka. Nunatsinni nunattalu avataani, Trump taama oqarpoq.
/ritzau/