NunaMineralsip aningaasaatini amerliniarpai
Nuna Mineralsip 2007-imut ukiumoortumik nalunaarutini saqqummiuteqqammerpaa. Nuna Minerals Namminersornerullutik Oqartussanit, Rudersdal A/S-imit Lønmodtagernes Dyrtidsfondimillu pigineqartoq, nalunaarusiaq naapertorlugu 400 miliuunit koruunit pallillugit naleqarpoq
Allattoq Jokum Nielsen
apriilip 16-at 2008 07:06
Ukioq mannamut nalunaarusiaq naapertorlugu Nuna Minerals misissuereernerit ilanngaatigereerlugit miliuuninik sisamanik ukioq manna amigartooruteqarnissani naatsorsuutigaa. Ukioq manna Nuup eqqaani Qeqertarsuarmi kuulteqarfik, Qussummi kuulteqarfik, Isua-ni aatsitassaqarfik Ymer Ø-milu allanik aatsitassaqarfik misissuiffigineqassapput.
Misissuinissat akissaqartinniarlugit ukiup affaani tulliuttumi Nuna Minerals aningaasanik pissarsiniartariaqassasoq nalunaarummi allassimavoq, tamannalu ilaatigut piginneqatigiissutinik amerliliinikkut pissalluni, tassa ataatsimeersuartut akuersisinnaassappata.
Nuna Mineralsip aningaasat nammineq pigisai 85 miliuunit koruuniupput.
