NunaMinerals piginneqataassutinik nutaanik tuniniaalerpoq
Aatsitassarsiortitseqatigiiffik ilaatigut Namminersorlutik Oqartussanit pigineqartoq, Danmarkimi nunanilu allani suliffeqarfinnut aningaasaliisartunut - tassa aningaaserivinnut, soraarnerussutisianut aningaasaateqarfinnut aamma sillimmasiisarfinnut piginneqataassutinik nutaanik tuniniaalerpoq.
Allattoq Elisa Isaksen
februaarip 05-at 2013 04:53
Aningaasat tuniniaanermit isertinneqartut suliffeqarfiup Kujataani Niaqornaarsuup Qeqertaasaani kuulteqarfiup misissoqqissaarnissaanut atorneqassapput.
Piginneqataassutit nutaat NunaMinerals-ip piginneqatigiissutaannik amerlisitsisinnaapput, 142 millionit koruuninik naleqalersillugit. Tamakkiisumik iluanaarutinit isertinneqartussaassapput 28 millionit koruunit missaat.
Suliffeqarfik 2000-it sinnilinnit piginneqataaffigineqarpoq, Namminersorlutik Oqartussat, Lønmodtagernes Dyrtidsfond aamma Nykredit Bank taakkununnga annernut ilaallutik. Taakkulu piginneqataassutinik nutaanik pisiniarnertik ilimasaarutigereerpaat.
