NunaMinerals kuultimik nassaarpoq
Eqqornerusumik oqaatigalugu, Kitaata kujataani qeqertaasami Niaqornaarsummi aamma Tunup kujataani Kangerlulummi nassaartoqarpoq.
Misissuinermik Vagarimik taaneqartartumik, NunaMineralsip ataaniittumik, akuersissummik peqarluni kuultimik nassaartoqartoq, NunaMineralsip juulimi nalunaarutigaa. Aappassaanillu misissuineq maanna aamma iluatsilluarpoq.
NunaMineralsimi pisortaaneq, Ole Christiansen, ima oqarpoq:
- Kujataani kuultisiornitsinni misissuinerput kingulleq iluatsilluarpoq. Amphibolite Ridgemi kuulteqarluartoq paasinarsivoq. Kuultip misissoqqissaarneqarnissaa maanna tullinnguuppoq, 2011-milu misissuinissavut piareersarlugit aallartissaagut.
Nanortallip eqqaani misissuiffissani 1.500 kvadratkilomeriusuni qilleriffissat minnerpaamik marluk nassaarineqarersimasut suliffeqarfik ilisimatitsivoq.
