NunaMinerals Canadamiunik kuultisioqatissarsivoq

Aatsitassarsiutileqatigiiffiup NunaMineralsip Nunatsinni sumiiffinni 16-inik ingerlatsinissamut akuersissummik peqartut Canadamiut aatsitassarsiorfiannik Nuukfjord Gold Mines-imik suleqateqarnissamik isumaqatigiissuteqarpoq, ilaatigut kuultimik piianissamik ingerlatseqatigissallugu.
Allattoq Jaaku Lyberth
juunip 25-at 2009 07:24

Kuultimik piianerit Qussummi Qeqertarsuarmilu Nuup kangerluaniittumi annertusineqarnissaannik kinguneqassasoq, NunaMineralsip pisortaa Ole Christiansen isumaqarpoq.

- Canadamiut aatsitassarsiutileqatigiiffiannik misilittagaqarluartumik suleqateqalernissarput iluarisimaartorujussuuarput. NunaMineralsip kuultimik piiaalluni suliaqarnerani Qeqertarsuarmi piianeq ingerlalluarnersaavoq. Nuup eqqaani kuultisiornermi Nuukfjord Gold Minesip suleqataalerneratigut Qeqertarsuup kuulteqarluarsinnaaneranik uppernarsaasuuvoq, Ole Christiansen oqarpoq.

Nunatsinni kuultimik piaasinnaanermik periarfissaqarluarnera NunaMineralsip sulisuinit iluatsittutut uppernarsarneqarpoq, Nuullu eqqaani kuultisiorneq taaguuteqartinneqartoq, Nuuk Guld Provinsen, eqqarsaatigineqartumit pivisunngortinneqarsinnaanera tulluusimaarutigineqarpoq, Nuukfjord Gold Minesip pisortaa Neil Brigss oqarpoq. NunaMineralsip ingerlatsinermut aningaasat 2009-imi 29,7 millioni koruuniunissaat naatsorsuutigaa, 6,8 millioni koruuninik pitsanngoriaateqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq