NunaMinerals: Avatangiisinut mingutsitsivallaanngitsumik aatsitassarsiortoqarsinnaavoq
- Kuannersuarni aatsitassat akuisalu annertussusaat qillerinikkut misissorneqarnerannut atatillugu uranimik akoqassusaat uuttortarneqarpoq. Aatsitassat tamakkerlugit qaarsumit peerneqarsinnaappata, tamarmillu tunisassiarineqarsinnaappata, taava 55 milliardi koruuninik naleqarsinnaassapput, Ole Christiansen oqarpoq.
Taassuma ilanngullugu erseqqissaatigaa tunisassiorfiliornermut tunisassiornermilu aningaasartuutit milliardilikkaat atorneqaqqaartariaqassasut.
Aammattaaq aatsitassarsiornermi periaatsit nutaat atorneqalernikuummata aarlerinaatitaqanngitsumik avatangiisinullu mingutsitsivallaanngitsumik tunisassiortoqarsinnaanissaa Ole Christiansenip neriuutigaa.
Narsap eqqaani uranimik piiaasoqannginnissaanik Narsami innuttaasut ilaasa piumasaqaataat taassuma paasilluarsinnaavai, piiaasoqalissanersorli piiaasoqalissannginnersorluunniit nammineq aalajangiivigisussaanagu oqaatigalugu.
