NunaMinerals aktianik tunisakinneruvoq
Aatsitassarsioqatigiiffik Nuna Minerals piginneqatigiissutinik aktianik tuniniaalerami ilimagisamit ikinnerusunik tunisaqarami, siunissami suliariniakkani piffissaq sivisunerusoq atorlugu suliariniartussanngorlugit, siulersuisuni siulittaasoq Anton M. Christoffersen ullumi RB-Børsenimut oqarpoq.
Nuna Mineralsip aktiat nutaat 650.000-it tuniniaraluaramigit 257.115-it, 112 milliuuni koruuninik nalillit kisiisa tunivai, taakkunannga 60 milliuuni koruunit piginnittunit, Namminersornerullutik Oqartussanit, Lønmodtagernes Dyrtidsfondimit Rudersdal A/S-imiillu neriorsuutigineqareernikuullutik.
Nuna Mineralsimi siulittasup oqaasii naapertorlugit piffissami matumani pappiaqqat nalillit tuniniarneqarneri nangaanartoqarmata aktianik tuniniaanermi anguniakkat 200 milliuuni koruunit anguneqaqqajanngillat.
Isertinneqartulli 112 milliuuni koruunit suliffeqarfiup aatsitassanik ujarleqqinnissaanut ilapittuutaalluasapput.
- Aningaasat isertitavut ukiuni tulliuttuni marlussunni aannertusaarlugit atussavagut, aningaasaliisullu ileqqaarinerlussimannginnerisa uppernarsinissaa uagut akisussaaffigaarput, Anton M. Christoffersen oqarpoq.
