Nunamik piginnittussaaneq tunniukkusunngilaat

Nunamik piginnittussaanerup kalaallinut tunniunneqarnissaa pissanngitsoq, pisuussutillu qallorneqartarnerini isertitat affaasa Danmarkimut tunniuttuarneqarnissaat, Danmarkimi nutaarsiassaqartitsivik P1 aqqutigalugu Dansk folkeparti kingumut taamatut piumasaqarpoq.

Savalimmiormiut nunaminnik pisuussutinillu piginnittussaaneq, nammineerlutik pigisarilernikuuaat, taamaammallu kalaallit aamma assingusumik pineqartariaqartut, Kuupik Kleist Dansk Folkepartiimut akerliliilluni oqarpoq. Inuit Ataqatigiillu akerliliinerat Demokraatinit isumaqatigineqarpoq. Per Berthelsen Demokraatit siulittaasuat ima oqarpoq:

- Dansk folkepartip allaat kanngunartuliornertut taaneqarsinnaasumik nipilimmik nunarput pillugu taama oqartuuteqartarnera aatsaat tusalinngilarput. Aamma taama oqariartuuteqarnertik, aningaasaqarneq pillugu ataatsimiisitaliarsuup iluani ingerlanniartaraluarpaat, qujanartumilli iluatsinngitsumik. Nuannaarutigaluguli oqaatigisinnaavara, ataatsimiisitaliami pineqartumi isumaqatigiissutigineqarmat, taanna 50 procenti qimanneqassasoq, taamaalilluni Kalaallit Nunaat Savalimmiormiut isumaqatigiissuteqarneranut assigunerusumik pineqarnissaa ammaanniarneqarluni. Dansk folkepartii ikinnerussuteqarluni taamatut oqarsinnaatitaavoq, kisianni ataatsimiisitaliarsuarmi ilaasortat amerlanerit Nunatta Savalimmiut pineqarsimaneranut assigusumik pineqarnissaa isumaqatigiissutigaat. Taamaammat neriuutigaara qallunaat suleqatigiissitami suleqatigisagut isummaminnik allannguissanngitsut. Taamaanngippammi tatiginassuseq ajalusoorujussuassaaq.

Taama oqarpoq Demokraatit siulittaasuat Per Berthelsen.