Nunalerinerup siuarsarneqarnissaa inatsisiliunneqalerpoq

Nunalerineq manna tikillugu aalisarnermik piniarnermillu inuussutissarsiutinut peqqussummi ilaasimagaluarpoq. Nunalerinerup iluarsartuussiffigineqarnerani inatsisissaq nutaaq ullutsinnullu naapertuuttoq paasiuminarnerusorlu, Inatsisartut isumaqatigiissinnaagunik tallimanngorpat akuersissutigissagaat naatsorsuutigineqarpoq.
novembarip 23-at 2009 15:25

Nunalerinermi inuussutissarsiornerup siuarsarneqarnissaanut inatsisissami, naalakkersuinikkut anguniarneqartoq tassaavoq, aningaasaliissutaasartut taarsigassarsisitsinermik taarserneqarnissaat. Tapersiisarnermi malittarisassat arlalitsigut paasiuminarnerulersinneqarlutillu qasukkaamineqassapput. Taarsigassarsitseriaatsit marluinnaat atorneqalissapput, tassaasut inuussutissarsiutit siuarsarnissaanut taarsigassarsiat aamma ingerlatsinermut aningaasaliinerit. Taamaalilluni soorlu traktorit assakaasuinut, nunalerinermi atortunut, nerukkaatissanut pisortat qularnaveeqqusiisarnerat ilaatigut paasiuminaassinnaasartut atorunnaassapput.

Inatsisissaq kaammattuinermik aamma imaqarpoq. Tassa inuussutisarsiutip siuarsarnissaanut aningaasanik taarsigassarsisimasup akiligassani nungukkiartortillugit Naalakkersuisut taarsersugassanut aamma tapiissuteqartalissammata.

Allatut oqaatigalugu: Aningaasanik atortup akiliutigisai qimmullugit akiitsunik apparsaasoqassaaq. Politikkikkulli ajunngisaarneq killissaqarpoq, tassami aningaasanik atortup taarsigassani aatsaat akilersorunigit tapiiffigineqarsinnaavoq.

Inatsisissap massakkut periarfissaasut ilaatigut paasiuminaassinnaasartut atorunnaartissavai, taakkumi ilaatigut nunatta karsianut akisuusarsimammata. Massakkulli akiliinissamut kinguartitsisarnerit piuminaannerulissapput.

Aamma 10 procentimik akiligassat qaavatigut pillaassutissiisarnerit atorunnaassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq