Nunaannarmi illoqarfik pisiarisinnaavat
Tuluit Nunaanni nunaannarmi illoqarfik alianaalluinnartoq Linkenholt tuniniarneqarpoq, 177 millionit koruuniuteqaruillu pisiarisinnaavat.
Pisisussap illoqarfeeraq kisiat pigilernavianngilaa, pisiaanummi ilaassapput illu 2000 kvadratmeteritut angissusilik, tassungalu atasut illut 22-t, nunaat naatitsiviusartoq, pisiniarfinnguaq, saffiorfiit marluk, meeqqanut atuarfinnguaq aamma timersorluni anaaleruttarfik.
Norgimi aviisi VG aamma tuluit tusagassiorfii arlallit taama allaaserinnipput.
Illoqarfinnguami tuniniagaanngitsutuaq tassaavoq oqaluffitoqaq, St. Peters, 1200-kkunnili sananeqarsimasoq.
Pisoorsuup Herbert Blagravep illoqarfinnguaq Linkenholt pigigaluarpaa. Taanna kingornussisussaqanngimmat, aningaasaateqarfiliortoqarpoq, aningaasat annerusumik meeqqanut utoqqarnullu napparsimasunut atorneqartussanngorlugit.
Aningaasaateqarfiup illoqarfinnguaq taanna, qanganisarpaluttumik tuluppalaartoq tuniniarniarlugu maanna aalajangiussimavaa. Aningaasaateqarfiup nalunaarutigaa, illoqarfinnguami illut ataasiakkaarlugit pisiarineqarsinnaanngitsut. Tassami illoqarfik tamarmiutillugu tunineqarusummat.
