Nuna tamakkerlugu sungiusaasoq: B-67 pissartanngortussatut piukkunnarput
- B-67 Nuummeersut arsariaaseqarput kusanarluinnartumik, taamaattumik ilimanarnerpaatut taasinnaavakka, Tønnes Berthelsen taama KNR-imut oqarpoq.
G-44 Qeqertarsuarmeersut aasaq manna avannaani anngunniunnerminni sakkortuunik unammisaqarsimanngillat, kinguneranillu asuli "nuannariinnarlugu" arsarsimallutik. Taamaammat ukioq manna pissartangorniutivinnissami sukataartitaalaarnissaat ilimagaa, maannamulli oqaatigisinnaasoraa ukioq manna pissartanngorniutivittussatut siorna imminnut naapittut B-67 Nuummeersut kiisalu G-44 Qeqertarsuarmeersut takoqqissagivut.
- Ukioq manna tupaallaataasutut taasinnaavakka Nagdlunguak´ Ilulissaneersut anngutinngimmata, aappaatigulli arsartartutoqaasimasut I-69-imut noorarsimanerat pissutaasinnaavoq, Tønnes Berthelsen oqarpoq.
T-41 Aasianniit ukiut arlallit pissartanngorniutivinnernut peqataasarsimanngitsut pissanganartutut nuna tamakkerlugu sungiusaasup oqaatigaattaaq, kiisalu Nagtoralik Paamiuneersoq ukiuni arlaqalersuni peqataasarsimanngitsut pissanganarsinnaanerattaaq eqqaallugu.
- Ukioq manna pissartanngorniutivinnissani iligiiaat taanngisakka, taaneqannginnertik sukasaatigissagaat neriuppunga, Tønnes O.K. Berthelsen nunanut allanut sungiusaasuusoq taama oqarpoq.
