Nunaqarfinni ilinniartitsisut illuisa pitsaannginnerat patsisaalluni, ilinniartitsisut isorliunerusunut atorfinitsinniartarnerat ajornakusooqaaq. Taamaattumik Kommune Kujallermi atuartitaanermut meeqqeriveqarnermullu ataatsimiititaliap Namminersorlutik Oqartussat suliniuteqarnissaat kaammattuutigaa. - Ukiuni makkunani meeqqat siunissaat angisuumik sammineqartillugu aamma atuartut nunaqarfinneersut pitsaasumik atuarnerminnik aallartitsisarnissaat siunertaralugu, ilinniartitsisunik ilinniarsimasunik amerlanerusunik atuartitsisoqarnissaat pisariaqarluinnarpoq, Kaj Lyberth atuartitaanermut meeqqeriveqarnermullu ataatsimiititaliap siulittaasua ilaatigut taama allappoq. Taassuma tikkuarpaa, illussaqarniarnikkut ilinniartitsisunut neqeroorutigineqartartut pitsaannginnerujussuat ilaatigut pissutaasoq, nunalu tamakkerlugu aaqqiivigineqarnissaa piumasaralugu: - Tamatuma nuna tamakkerlugu aaqqiivigineqarnissaa pisariaqarluinnarpoq, Kaj Lyberth allappoq, erseqqissarlugulu pissutsit aaqqinniarnissaannut Kommune Kujallermi oqaloqatiginninnissamut piareersimallutik, taamaattorli aaqqiissutissanik tigussaasunik siunnersuuteqarani.
