Nuna qeriuaannartoq aakkiartulersimavoq, tamannalu aqqusineqarnermut kuuffiinnullu annertoorujussuarmik kinguneqartussaavoq, nuna qeriuaannartoq aakkaangami kiviartulisarmat.
Nuna qeriuaannartoq paasisaqarfiginerujumallugu ukiuni tulliuttuni pingasuni ilisimatuut illoqarfinni sisamani nunaqarfinnilu marlunni nuna qeriuaannartoq misissuiffiginiarpaat.
Ilisimatuut neriuutigaat taamaaliornermikkut sumiiffinni ajornartorsiutinngorumaartussat sioqqutillutik paasisaqarfigisinnaassallugit. Taama oqaluttuarpoq ilisimatooq Danmark Tekniske Universitet-imi ilinniartitsisoq; professor; Niels Foged.
Silaannaap kissakkiartorneranut atatillugu nuna qeriuaannartoq nunap qaavaniit aakkiartulersarpoq,
aanneralu tatsinik taseqqanillu pilersitsisarpoq nunalu annertoorujussuaq maniilakulatsittarluni, tamannalu kalaallit nunaanni innuttaasunut kinguneqarnerluttussaavoq, piffinni ataasiakkaani nunap qeriuaannartup aanneratigut nuna kiviartuler-sinnaavoq, imikup annallu kuuffii aqqusernillu innarlerneqassallutik tamannalu annertoorujussuarmik aserfallatsaaliunermik aningaasarpassuarnik naleqartussamik kinguneqartussaalluni, taamaattumik misissuinissatsinni misissortussaavarput illoqarfinni nunaqarfinnilu nuna qeriuaannartoq sumerpiaq aakkiartulersinnaanersoq, taamaalillutik siunissami sanaartortarumaartussat pilersaarusiortarnissaminni nuna qeriuaannartoq sanaartorfigissanerlu sanaartorfigissannginnerluguluunniit ingerlatsinikkullu qanoq akeqarsinnaanera nalunngereerniartassam-massuk. Qujanartumillu Kalaallit Nunaanni illuliorniartut illuliortartullu amerlanerit nalunngereertarpaat sukkut illuliussanerlutik, tassalu qaarsup qaavatigut. Misissuinitsinni sanaartortanissani avaqqunneqarsinnaanngitsut misissuiffigisassagut tassaaput; aqqusernit, nunaminertallu soorlu manissakkat arlaannut atugassiat, imikup annallu aqqutaasa kuuffii, ledning-it aqqutaat, ilaalu ilanngullugit tassalu tamakkua siunissami sanaartornissani ajoquserneqannginnissaat misissuiffigisussaavarput.
Kalaallit danskit amerikamiullu misissuissapput,
misissukkallu inerneri ukioq 2050-p tungaanut atorneqartussatut nalunaarsorneqassapput.
