Nuna Perumi sajorujussuarpoq
Perumi innuttaasut nunap sajorujussuarneranit unnuaq itertitaapiloorput. Perup illoqarfiisa pingaarnersaata, Limap, kujammut kangisissuanit 145 kilometerinik ungasitsigisumi nuna ukiuni 50-ini taama sakkortutigisumik sajussimanani unnuaq taama pivoq.
Nunap sajunnera Richterip uuttuutaa malillugu 7,9-mik sakkortussuseqarsimavoq, nunalu ima sakkortutigisumik sajuppoq, allaat Limami malugineqarsinnaasimalluni. Nutaarsiassaqartitsivik Ritzau taama allaaserisaqarpoq. Takunnittut oqaluttuarput illut uppikaasimasut, innaallagiaarulluni inuppassuillu uiversimaqisut.
Inuit ikinnerpaamik 72-it ajunaarput 680-illu ikiligaallutik, naalagaaffimmi atorfillit nutaarsiassaqartitsivimmut Ritzauimut oqaluttuarput. Annaassiniartut nunap sajuffianut anngummata ajunaartut amerlassusaat annertusiartorsimapput.