Nuna Oil annikitsisuinnarmik sinneqartooruteqarpoq
NUNAOIL A/S nalunaaruteqarpoq piginneqatigiiffiup ukiumut naatsorsuutai 2006-moortut 100.000 kr.-nik iluanaaruteqarfiusut.
Kim Breinholt Hansen-ip ilanngutassiaa Elisa Isaksen-imit atuarneqassaaq:
Iluanaarutit annertugisassaanngikkaluartut, inernerit missingersuusianiit pitsaanerupput, tamanna patsiseqarpoq annertuumik sajuppillatsitsisarnernik paasissutissanik tuniniaasoqarsimaneranik nunani allani uuliasioqatigiiffissuarnut.
Akilersinnaasumik uuliamik gassimilluunniit nassaartoqanngippat nassaarineqartussanillu tunisas-siortoqalinngippat NUNAOIL-ip ilimagisimagaluarpaa, piginneqatigiiffik amigartoorfiulluni ingerlassasoq.
NUNAOIL A/S 2006-mi ilaatigut Qeqertarsuup Tunuani Nuussuullu imartaani uuliaqarneranik ujaasisussanik qinnuteqartussanik suliaqarsimavoq. Uuliasiortussanik ujaasinermi inernerit takutippaat Nunatsinni uuliamik/gassimillu ujaasinissat soqutigineqarluartut.
Taamaattumik NUNAOIL A/S-ip Aatsitassaqarnermut Pisortaqarfik suleqatigerusuppaa, nutaanik sajuppillatsitsisarluni uuliasiornissamut atatillugu paasissutissanik 2007-mi Qimusseriarsuarmi misissuinissami. Paasissutissat nutaat nunat tamat akornanni uuliassiornissamut soqutiginnilersitsissasut naatsorsuutigineqarpoq.
NUNA OIL A/S-ip erseqqissaatigaa Nunatsinni uuliaqarneranik misissuineq siunissaq ungasinnerusoq isigalugu pilersaarutaasoq.
Nunatsinni misissuiffigineqarsimasut ikittuinnaapput, taamaattumillu Nunatsinni uuliaqarneranik/gasseqarneranillu nassaarsinnaaneq ilimanaateqarluarpoq. NUNAOIL-ip ilaatigut suliassaraa nunat tamat akornanni uuliasioqatigiiffiit soqutiginnilersissallugit.