Nuna Fondi qinnuteqaatinut tapiivoq

Aningaasaateqarfiup NunaFondip siulersuisuisa katillugit 1,8 millionit koruunit agguaappaat, taakkualu saniatigut Sisimiuni kulturip illorsuanut Taseralimmut immikkut ittumik 600.000 koruuninik tapiisoqarluni.

Nuummi kulturip Illorsua Katuaq aamma 600.000 koruuninik tapiiffigineqarpoq, taakkulu ukiuni tulliuttuni pingasuni ukiumut 200.000 koruuninngorlugit tapiissutigineqartassallutik.

Isiginnaartitsisartoqatigiit Silamiut, Holbergip isiginnaartitsissusiaanik “Jappa Qaqqarmiu”-mik isiginnaartitsissusiornissaminnut 200.000 koruuninik tapiiffigineqarput, kalaalinngorsarlugu taasaminnik “Kalaaleq Jappa” – eqqarsaataavorlu isiginnaartitsisummi Rasmus Lyberth “Kalaaleq Jappa”-tut pingaarnertut inuttaassasoq.

Tamatuma saniatigut nipilersornikkut aaqqissuussinerit, atuakkanik saqqummersitsinerit, angalanerit nunanilu allani ilinniagaqarnerit tapiiffigineqarput.

Nunarsuaq tamakkerlugu aningaasarsiornikkut ajornartorsiorneq NunaFondip ukiuni tulliuttuni tapiisarneranut sunniuteqassaaq. Aningaasaateqarfiup isertitai, aningaaserivinnik piginneqataassutineersuummata, aningaasaateqarfiup naatsorsuutigaa, ukiuni tulliuttuni marlunni isertitaqartussaanani, tassami ukiuni tulliuttuni marluni Grønlandsbanken piginneqataasunut aningaasanik tunniussisussaanngimmat.

Taamaattorli aningaasaateqarfik suli aningaasaateqarmat, 2009-mi 2010-milu ukiumut 1,9 million koruuninik tapiisoqartassaaq.

Tamanna pissutigalugu ukiumut ataasiaannarluni tapiissutinik agguaasoqartassaaq, tamannalu decembarimi pisassaaq, qinnuteqartussallu novembarip aallaqqaataa nallertinnagu qinnuteqartassapput.

Ukioq manna naappat aningaasaateqarfimmi maannamut siulittaasuusoq Kuupik Kleist tunuassaaq, Jørgen Wæver Johansenimillu taarserneqassalluni.