Nukâka Coster-Waldau isiginnaartitsisartunngorpoq
Kalaaleq arnaq Nukâka Coster-Waldau 35-inik ukioqartoq Statens Teaterskolemi ukiuni sisamani artornartuni ilinniareersimalluni isiginnaartitsisartutut naammassivoq. Sulilertiganili feeriaqqaassaaq, assut pisariaqartitaminik.
-Nuanneq, pilluaqaanga qasoqaanga. Ukiut sisamat pikkunanaarnikuugakkit. Sivisoqigamik ilaannikkut taamatorsuaq atuarluni meeqqiorlungalu, uinnguaralu aamma sulinermut angalasaqattaarluni. Pikkunaqaaq. Kisianni nuanneqaaq naammassilluni.
Nukâka Coster-Waldauip uia Nikolaj Coster-Waldau aamma isiginnaartitsisartuusoq Nukâkap ilinniarfiani 1993-imi naammassisimavoq. Aappariit Coster-Waldauikkut marlunnik meeraqarput tallimanik marlunnillu ukioqartunik. Siunissarmi taava qanoq takorloorpaa.
-Tassa isiginnaartitsisartutut sulerusuppunga, isiginnaagassianut peqataasarlunga, aamma filmiliorusuppunga fjernsyniliorusullungalu. Tamaasa kisiannilu aamma erinarsorneq maqaasillugu, taanna aamma sammerusuttorujuuara suli.
Filmiliamut ukiamut takutinneqartussamut annikitsumik ilaariarluni, tullinnguuppaa nunatsinni isiginnaartitsissusiamut norskip Jo Strømgrenip ilitsersugaanut septembarimi Nuummi suliarineqartussamut ilaanissani. Isiginnaagassiaq ”Polaroid” nunani avannarlerni tamani immaqalu Canadami takutinneqassaaq.
- Pissanganarpoq. Nuannerunaqaaq, assut.
Nukâka Coster-Waldauip naammassigaluarluni isiginnaartitsisartutut inuuneq aatsaat ilinniartussanngorlugu misigaaq. Ilinniarfimmi sapaatip-akunneranut nalunaaquttap akunnerini 50-t sinneqartut ilaanni atortariaqartarsimalugit qasuersaarusulivissimavoq.
- Massakkut feeriassaanga. Feeriarnissara assut qilanaarinikuuara. Feerialerpunga paneeqqakka uigalu ilagalugit.
Naggataagullu kalaaleqatini Statens Filmskolemut iserusuttut qinnuteqaqquai.
- Piviusunngorsinnaavoq piumalluaraanni. Nukâka Københavnimi nerersuaaqatigiittuniittoq ualiartoq akornuseratsinni taama oqarpoq.
Nukâka Coster-Waldau katinngikkallarami Motzfeldtimik naggateqartoq Statens Filmskolemi isiginnaartitsisartutut ilinniartut arfineq-marluk allat arfinngormat juunip ulluisa 19-iani naammasseqatigai. Kisimiilluni kalaaliugaluarluni nunanit allaneersut atuaqatigigamigit allaanerusutut migisimasimanngilaq.
