Nukkassaatitorsimaneragaasoq aalajangiivigineqarpoq
Nukkassaatinik allanillu timimut pissassaatinik atuisarnermik ataatsimiititaliap Petrus Brønlund pillugu suliaq maanna aalajangiivigaa. Nerrivimmi arsaarartartoq nukassaatinik allanillu timimut pissassaatinik atuisarnermik aalajangersakkami sakkortunerpaamik pineqaatissinneqarpoq, tassalu sungiusarsinnaanerminut, unammersuarnernullu tamanut, qaammatini pingasuni maajip ulluisa 16-ianniit atuutilersumik, ilaasinnaajunnaartitaagami.
Iliuuserisimasamut kingunerititamut tunngavigineqarpoq Petrus Brønlund-ip ikiaroornartumik hashimik pujortarsimanera, naak hashitorsimanini timersuutigisamigut iluaqutiginiarsimanngikkaluarlugu, hashimik pujortarneq timersornerup silarsuaani akuerineqarsinnaanngitsutut isigineqartoq, aalajangiinermi allassimavoq.
Petrus Brønlund-ip ataatsimiititaliap ataatsimiinnerani najuuttup, aalajangiineq tusaatissatut tiguaa, sapaatip akunnerinilu sisamani eqqarsarfissalerneqarpoq, aalajangiineq Kalaallit Nunaanni Timersortartut Kattuffiani suliareqqitassanngortitsinermut ataatsimiititaliamut suliareqqitassanngortissanerlugu.
