Nukkassaatinik atuisarsimanersut misissorneqarpoq
Antidoping Grønland arsaattartunik 15-inik Qaqortumi Nuummilu misissuivoq. Team Grønlandip allattoqarfiani pisortaq Finn Nielsen Sermitsiamut taama oqarpoq, Sermitsiallu nittartagaani atuarneqarsinnaalluni.
- Nalunaarutigineqanngitsumik Nuummi timigissartarfimmut pulaarpugut, tassanngaanniillu Qaqortuliarluta. Arsaattartunik tassani misissuivugut, taekwondortartullu nunanut allanut unammisartut aamma misissuiffigillutigit, Finn Nielsen oqarpoq.
Finn Nielsen Antidoping Danmarkimeersoq Keld Verenfeldt angalaqatigivaa. Antidoping Danmark aamma Antidoping Grønland suleqatigiipput.
- Arsaattartut arlaqartut kinaaneri apeqqutaatinnagit misissuiffigaavut, misissuinerillu inerneri Oslomi laboratoriami misissorneqartussaammata sapaatip-akunneri pingasut sisamalluunniit qaangiuppata aatsaat tigusinnaassavagut, Finn Nielsen Sermitsiamut oqarpoq.