Nukkassaatinik atuisarnerup akiorniarneqarnerunissaa ujartorneqarpoq
Timersortartut pikkorinnersaasa ilaat marluk ikiaroornartumik hashimik Ilulissanut ukioq-manna eqqussinerat, aamma arsaalluni nunanut allanut unammisartut Nunatsinni siorna pissartanngorniunneranni arsaattartut marluk ikiaroornartumik hashimik atuisimanerat paasineqareersorlu Niels Thomsen taama apeqquteqarpoq.
Taamaammat Niels Thomsenip Naalakkersuisunut apeqqutigaa, nukkassaatinik timersortartut atuisarnerisa akiorniarneqarnerannut Naalakkersuisut sukumiinerusumik suleqataanerusinnaanersut, timersortartullu aanngajaarniutinik inerteqqutaasunik atuinermikkut imminnut akornusernissaat pinngitsoortinniaqqullugu.
Timersortartut pikkorinnerpaat Nunatsinni amerlasuunit nuannaartorineqartarnerat Niels Thomsenip eqqaasitsissutigaa, taamaattumillu taamatut isigineqarnertik immikkut akisussaaffigigaat.
Nunatsinni pissartanngorniuttoqassagaangat timersortartut tamarmik ikiaroornartumik atuisimanersut misissuiffigineqartassasut Demokraatit piumasaraat.