Nukissiorneq pillugu Sisimiuni isumasioqatigiittoqarpoq
Mingutsitsinertaqanngitsumik nukissiorneq Kalaallit Nunaanni siammaannerusariaqarpoq. Tamanna ilaatigut siunertaralugu nunat tamalaat peqataaffigisaannik Sisimiuni marsip aallaqqaataaniit pingajuat ilanngullugu isumasioqatigiittoqassaaq.
Isumasioqatigiinneq ”issittumi mingutsitsinertaqanngitsumik nukissiorneq” -mik taaneqartoq Sanaartornermik Ilinniarfimmit Sisimiuniittumit aamma Center for Arktisk Teknologi-mit aaqqissuunneqarpoq. Nunat issittumiittut tamarmik peqataanissaat ilimagineqarpoq.
- Mingutsitsinertaqanngitsumik issittumi nukissiorneq ilisimasaqarfiginerusariaqarparput, ilisimatitsissutigerusullugulu, taama oqarpoq ilisimatooq Arne Villumsen pilersaarusiortuusoq. Taassuma ilimagaa isumasioqatigiinnermi inuit 100-t missaanniittut peqataassasut.
