Nukissiorfiit EU-mit allanik paasisaqarluarput

EU-p nunanut tamalaanut nukissiuuteqarneq pillugu Bruxellesimi januaarip naanerani ataatsimeersuartitsineranut, nunatsinni Nukissiorfiit ilaapput. Piujuaannartitsinissaq tunngavigalugu Nukissiuutinik atuisinnaaneq sammineqarpoq, ataatsimeersuarnermilu pissarsiat tunngavigalugit nunatsinni meeqqat atuartut nukissiuutinik atuineq pillugu aappaagu paasisitsiniaaffigineqassapput. Tamakku saniatigut allanik aamma pissarsiaqarsimallutik, Nukissiorfiit sinnerlugit ataatsimeersuarnermut peqataasup aappaa, Inga Dora Gudmundsdottir oqaluttuarpoq:

-Nunarput sinnerlugu peqataagatta silaannaap kissakkiartornera nunatsinnullu kinguneri sammingaatsiarpagut, maluginiarparpullu nunatsinniit aatsaat peqataasoqariarmat soqutigineqarnerput assut angisimavoq.

Nunatsinnut soqutiginnittut ilaat International School of Bruxelles nunatsinni aturfeqarfimmik suleqateqarusuttoq Nukissiorfinnut saaffiginnereersimavoq.

Meeqqat atuarfiani atuartut ilaat taavalu Inaternational School of Bruxellesimi atuartut ilaat sulqatigiillutik nukissiuuteqarnermut tunngasunik, internetti iluaqutigalugu sammisaqartinneqarnissaat siunniunneqarpoq.

Hollandimiut TV-qarfiat nunatsinnut aallakaatitassioriratorusulluni aamma saaffiginnissimavoq.

Aamma Europami meeqqanut internettikkut assigiinngitsorpassuarnik sammisaqarfiusartumut, soorlu mingutsitsinermut tunngasunik sammisaqarfiusartumut Kids Cornerimut nunatta ilanngunneqarsinnaanera paasineqarsimavoq.