Nukissiorfiit brinti pillugu sammisaqartitsissapput
Nukissiorfiit Atlantikup Avannaani Brintisiortartut Kattuffiannut, Nordatlantisk Brintforeningemut, NAHA-mik naalisarneqartartumut - 2006-imili ilaasortaavoq, Atlantikup Avannaani brintimik nukissiuutitut suleqateqarfiulluni.
NAHA Nukissiorfiillu Nuummi workshopertitsinissamut, Nunavummiit, Islandimiit, Savalimmiuniit, Norgemiit Kalaallit Nunaanniillu peqataaffigineqartussamut, aggustip ulluisa qulingiluaanni qaaqqusipput, maannamullu misilittakkat arlallit peqataasut sammissavaat.
Brint namminermini ikummatissatulli, soorlu aamarsuartut, uuliatut gassitullu nukissiuutaanngilaq, nukissamilli tigummisuulluni. Tassa imaappoq, brint nukissamik toqqorterinermut atorneqarsinnaavoq, soorlu assersuutigalugu seqinnertinnagu anorlertinnagulu nukissiuutissaqarsinnaanngorluni.
Tassa brint batteriitupajaaq atorneqartarpoq, tamatuma kingorna brint innaallagissiornermut kiassarnermullu, aamma assersuutigalugu biilinut angallatinullu ikummatissatut atorneqarsinnaalluni.
Ukiuni makkunani, uuliap akisuffigisaani, ikummatissallu mingutsitsissutaaffigisaanni, brint soqutiginartuuvoq, mingutsitsisuunngimmallu, pingaartumik maani nunatsinni, erngullu nukinga atorlugu suliarineqarsinnaalluni.
Aggustip ulluisa qulingiluaanni workshopertitsinermi Kalaallit Nunaanni brintimik misileraavimmi siullermi misilittakkat Nukissirfimmiit saqqummiunneqassapput, Norgemillu oqaluttuarineqassaaq anorip- brintillu nukii atorlugit ungasissumut pilersuisinnaaneq.
