Nukissiorfiit aningaasanik peqquserluffigineqarput
Nukissiorfiit politiinut nalunaaruteqarnerisa kingorna, angut pineqartoq januaarip arfernanili tigummigallarneqalersoq, aviisimi Sermitsiami allaaserineqarpoq.
Unnerluutigineqartup atortut maskiinallu igitassaanerarlugit Danmarkimut nassiuttarsimavai. Tamakkulu Danmarkimi internetikkut tuniniarneqaqqittarsimallutik.
Danmarkimi nassinneqartartoq peqquserluuteqarsimasutut aamma unnerluutigineqarpoq.
Politimestereqarfimmit unnerluutiginnittumit Michael Hansenimit oqaatigineqarpoq, angutip 45-nik ukiullip containerit qulingiluat atortunik ulikkaarlugit Danmarkimut nassiuttarsimagai.
Angutip ukiuni marlunni pinerluuteqarsimasunut inissiisarfimmiittussanngorlugu eqqartuunneqarnissaa aamma 1,1 millionit koruuninik taarsiisussanngortinneqarnissaa unnerluutiginnittut piumasariniarpaat.
Suliassap imaannaanngitsuunera pissutigalugu suliassaq illoqarfiup eqqartuussiviani suliarineqarani Nunatta Eqqartuussiviani suliassanngortinneqarpoq.