Nukissiorfiit amigartoorput

- Ukiumoortumik angusat tassaapput nunap karsianit akiliuteqartoqannginnerani
94,8 millionit koruuniinik amigartooruteqarneq.

Nunap karsianit ingerlatsinermut akiliutit 75,3 millionit koruuniit missaanniipput.
Tamanna ilanngaatissat ilanngaatigereerlugit nammineq aningaasaatit 19,5 millionit koruuniinik ikileriarnerannik kinguneqarpoq, Nukissiorfiit nittartakkaminni allapput.

Nukissiorfiit allapput amigartooruteqarnermut pissutaasut tassaasut innaallagissamik pilersuinermi isertitat kiassarnermillu pilersuinermi isertitat ikileriarsimanerat.

- Kiassarnermit kaaviiaartitat 12,7 millionit koruuninik appariaateqarsimapput. 2010-mi kiassarnermut akigititanik allannguisoqarsimannmgilaq. Appariaat Kalaallit Nunaat tamaat isigalugu 2010-mi kiannerungaatsiarsimaneranik peqquteqaannarpoq, Nukissiorfiit allapput.

Innaallagiaq atorlugu kiassaaneq aalajangersimasoq qaminneqarsinnaasorlu tassunga ilanngukkaanni 10 procentit missaannik appariaateqarfiusoq aamma nassuiaatigineqarpoq.

2011-mi angusat 3,6 millionit koruunit missaannik sinneqartoorfiunissaat Nukissiorfiit naatsorsuutigaat, Nunatta karsianit tapiissutit 74,7 millionit koruunit matumani ilanngunneqarnerat aamma taaneqarluni.

Nukissiorfiit pisortaanerat Svend Hardenberg marsimi nammineq tunuarpoq, aviisillu AG-p qanittukkut tusarliuppaa Svend Hardenberg partiimi Siumumi siunnersortitut atorfinittoq.